[dropcap]М[/dropcap]ай зурул 26-нний даврил аьрххилий Лакрал райондалийн бувкIунни Да­гъусттан Республикалул ХIукуматрал хъунама Артем Здунов бакIчисса делегация. Делегациялувух бия: ДР-лул ХIукуматрал хъунаманал цалчинма хъиривчу ХIажимахIаммад ХIусайнов, «Газпром» газораспределение Дагестан» ООО-лул каялувчи Ризван ГъазимахIаммадов, экономикалул министрнал буржру биттур буллалисса ХIажи Султанов, вайннал кумагчитал ва цайми-цаймигу бусравсса хъамал.

---

Хан-Муртазааьлил гьайкалданучIа хъамал хьунабакьин бувккун бия райондалул бакIчи Юсуп МахIаммадов, администрациялул зузалт, идарарттал каялувчитал.
ГьайкалданучIасса Вирттаврал Аллея­луву мурхьругу бувгьуну, хъамал яла лавгуна Гъумучиял дунияллийх цIа дурксса Хъун-Мизит ккаккан. Мичча лавгуна Гъумучиял бярничIан. Ххал бувуна Гъумуксса Вирттаврал чIира.
Муния махъ райондалул бакIчинал кабинетраву премьер-министрнал ва ванал хъиривчунал кьамул бувна агьали. Райондалул багьу-бизулуцIун бавхIусса мурадирттая бусан увкIун ия 8 инсан.
КIулшиву дулаврил управлениялул каялувчи Явсупи ХIамзаевлул бувсуна буллай лахъи лавгсса Гъумучиял школалия.

ХIажимахIаммад ХIусайновлун кIулну бия ва масъала. Мунал бувчIин бувна школа къуртал бан итадаркьуну душиву 83 миллион къурушрал ва шинал ахирданийннин тапшур бансса ният душиву.
Хъунисриннал советрал хъунама Даниял Магьдиевлул, махъсса ряхра-арулла шинал мутталий райондалий хьусса ххуй чулийннайсса дахханашивурттаятугу бувсун, кIицI лавгуна агьалинал яла цIуцIимур кIанттун ккаллину бушиву газ буцаврил масъала. Мунинсса жавабран ХIажимахIаммад ХIусайновлул кIицI лавгуна жула республика хьхьичIуннай шаврил ца агьамсса ххуллуну ккаклай бушиву Лакрал ва Ккуллал районнайн газ буцаву.

— Вай кIира район «газрал блокадалуву» лирчIун душиврия Республикалул БакIчинан баян бувссар. Ганал му суал хьхьичIххуттайн лавсун, хIакьину ХIукумат зий дуссар му проект чулийн дуккан даврил ялув, — увкунни вице-премьернал.
Ризван ГъазимахIаммадовлул кIицI лавгунни зий бушиву 8 зун­ттал район газрал щаллу давриха. ХьхьичIххуттай ккаклай бусса бур Лакрал, Гъуниннал ва Шамиллул районну. Ванал бусласимунийн бувну, лахъсса зунттал районнай тIабиаьтрал газ буцаврицIун дархIусса нигьачIавугу дусса дур лахIунтту дагьаврия. Масалдаран, тIабиаьтрал газ бувцусса Бущихъиял райондалий лахIунтту дуккаврийну апатIсса ишру хьуну бусса бур. Мунияту хIукму бувну бур лахъсса зунттал районнайн буцин жиженный газ. Му газ ххилансса станциярду бишинтIий бусса бур ххюра шяраву: ГьунчIукьатIув, Хьурив, Гъумук, ШавкIрав ва Щарав. Вай щархъава яла къяртри дуцинтIий дур лагмасса щархъайн. Газ буцлай байбишинтIий бур ялунчIил. Июнь зуруй хьунтIий дусса дур проект ххал дигьаврил презентация.
Райондалул азарханалул хъунама хIакин АьвдурахIин Дибировлул бувсунни цIуллу-сагъшиву дуруччаврил тагьардания. КIицI лавгунни азархана тIивтIуну бушиву 1980-ку шиннардийра дурну диркIсса райкомрал къатраву ва 2003 шинал дуллай дайдирхьусса цIусса азарханалулми къатри хIакьинусса кьининийнгу къуртал дан дурану душиву.

Ва суалданул хIакъиравугу бувчIин бунни шинал ахирданийннин больница тапшур бансса хIарачатрай бушиву. ХIукуматрал итадаркьуну дусса дур 158 млн. къурушрал. ДачIи арцу харж дантIий дусса дур къатри къуртал дан, дачIи – оборудование ласун.
Артем Здуновлул цала кумагчитал ва Строительствалул министерствалул пишакартал тIайла бувккунни школа ва азархана буллалисса кIанттайн, ми­ккусса тагьар ккаккан.
АьвдурахIин Дибировлул кIицI лавгунни ца цамургу пик­ри.

— Махъсса шиннардий анаварсса бущилий ппив хьуну най дур онкологиялул цIуцIавуртту. Му цIуцIаву дусса къашайшалтран яла аьркинмурнугу хъанай бур марцIсса гьавагу, экологиялул чулуха уздансса дукрагу. Ми шартIру жула райондалий душиву хIисаврайн лавсун, на маслихIат бавияв ший онкоцентр бан. Ягу буван геронтологиялул центр, райондалий ялапар хъанахъисса инсанталгу хъунмурчIин бугьарасса бухьувкун.
Артем Здуновлун ва пикрилий дакI даркьунни.
Щинал ялувсса суалдану­хьхьун жаваб дуллай, ХIажи­махIаммад ХIусайновлул бувсунни ларгсса шинал налогир­ттан дуркIсса арцу итадаркьуну душиву шяраваллурду щинал дузал дан.
— Ва мурад щаллу бан гьашину итадаркьуссар 1 млрд. ва 700 млн. арцул. Жу дакIний буру, ва программа вара лагрулий гихуннайсса шиннардийгу щурущи даншиврул, ХIукуматрал цIания республикалул БакIчинайн бу­ккан, — кунни ванал.

Юсуп МахIаммадовлул ххи бунни гьашинусса шинал зий бушиву ТтурчIайнна зунттуя Гьухъаливсса ва Ххюлусмату Гъумукунсса щинаххуллурдал проектрал ва сметалул документирттал ялув.
Му гьарцагу чулуха тIалав­шин ва аьркиншин ххисса хьунабакьаврий ххал бивгьуна ялагу личIи-личIисса аьркинсса ма­съалартту.