[dropcap]М[/dropcap]ай зурул 25-нний Къазаннай шадлугърал даражалий дайлиртIунни Аьрасатнал субъектирдаясса ва цаймигу билаятирттаясса жагьилсса пишакартал гьуртту хьусса Миллатирттал дянивсса VII-мур «ЗахIматрал пишардал» чемпионатрал даву.
Имара Саидова
Ва чемпионатрай «Медицинский и социальный уход» тIимур компетенциялий кIилчинмур кIану бувгьунни Дагъусттаннал Медициналул колледжрал кIилчинмур курсрал студентка Написат Халитовал.
Чемпионатрайн ва хIадур бувну бур медициналул ва социал аякьалул пиша лавай бавриха зузисса эксперт Фироза НухIовал. Шиккува кIицI лаган, Дагъусттаннал чулуха микку гьуртту хьуссия 8 эксперт ва 8 пишакар.
Чемпионатрай бяст-ччаллу най буссия 91 журасса компетенциярттай, миннува 48 компетенциялий гьуртту хьуссар чIава пишакартал.
Чемпионатрай гьуртту хьунни 1513 конкурсант, миннава 152 ия чил билаятирттаясса ва 363 – чIава пишакар.
Гьуртту хъанахъиминнал сияхIрайну исват хъанай бур «ЗахIматрал пишардал» чемпионатрал сий ялу-ялун гьаз хъанай душиву ва жагьилсса, зун гъира-шавкь дусса пишакартал чIяву хъанай бушиву.
