[dropcap]В[/dropcap]ай гьантрай Москавлив хьунни «Лакку билаятрал кубокрал» цIанийсса ттуплий буккаврил бяст-ччал. Ши­кку гьуртту хьунни 5 команда – ЧIятусса (кIира команда), Гъумучатусса, Вихьлиясса ва Хъусращатусса.

Андриана Аьбдуллаева
Ягинсса бяст-ччалливу цалчинсса кIану бувгьунни ЧIяйннал цалчинмур командалул, кIилчинсса – Гъумучиял командалул ва шамилчинсса – ЧIяйннал кIилчинмур командалул. Миннан кубокру ва арцуйнусса бахшишру дуллунни бусравсса хъамал ХIусайнов Арсен Буйдалаевичлул, Мушидова Разита Даудовнал ва Щаратусса ккарччал хIакин ЦIаххаев Рамазаннул. Бяст-ччал ххал бан бувкIун бия Москавлив ялапар хъанахъисса чIявусса лак.

Ттуплий буккаврил бяст-ччал сакиншиндарай, низамрай лагаву мурадрай ва давриву чялиш­сса гьурттушинна дунни «Ла­кку билаятрал рухI» группалува­сса Москавлив ялапар хъанахъи­сса ххаллилсса лакку оьрчIал ва душварал: Залимханнул, Аскердул, Сабирдул, МахIаммадлул, Гулизардул, Аьйшатлул.
Грамота ва Кубок буллунни Хъусращиял шяравасса сакиншиндарал комитетравасса Залимханнунгу.
— ТIуркIурдал агьаммур мурад куннащал ку кIул шаву, лак­рал дянивсса дусшиву цIакь шавуя, — тIий бур сакиншинначитал.
Барча буллай буру ххув хьу­сса командартту ва цинявппа бахшишру ларсми.