Лакку билаят. Явара ва цуппагу анжагъ зунттавур бусса. Цайми кIанттурдал заллухъру чIявусса бикIай Мунияту ттуща гай кIанттурдайн «лакрал кIантту» учин хъанан къабикIай.

Гьай-гьай, зунттал тIабиаьтрал хасият «кканпитI» дакъар. Цукун бухьурчагу, жула нитти-буттахъал, гайннаяр хьхьичIминналгу ва билаят язи бувгьуну бур. Нитти-буттагу, ватангу цар дикIайсса. Жува вай кIира затраллу дунияллийх занази бувссагу. Нитти-буттал дунияллийн буккан бувссару, ватандалул гания гихунмай ябуллалиссару, ягубувантIиссару. Шиккува ябаврицIун бавхIусса ца хъярчийсса мисалгу буцин ччива.

Уттигъанну на кулпатращал Хъуннеххая бувгьусса къизил-балугъ дагъ буван хIадур буллай уссияв. Ганин га ци балугъ буссарив дакIния бувккун бия. На бувсъссия га къизил-балугъ бушиву. Цийнмагу «паччахIнал балугъ» учайшиву. «Жувагу хIакьину – на паччахI, ина паччахIнал щарсса хъанахъи­ссару», — куссия.

Утти зана хьунну жулла интничIан. Лакку билаятрайн инт, кьанив кунна дакъа, цахъи махъ дучIай. Гьай-гьай, март­рал 21-нний хьунадакьай Интнил хьхьугу. Ца-ца чIумал инт географиялул чIумуйн мютIи къахъанан дикIай. Буслан бикIай дунияллул тIабиаьтрал дяркъу-гъилишиву та Атлантика океандалул щинал дяркъу-гъилишивруцIун дархIуну ду­ссар тIий.
Цукун духьурчагу, чантIа тIун диркIунни Лакку билаят­райсса инт.

Му чантIа тIавугу дархIуну дур лухччай ппиж тIисса урттуцIун ва дараччи тIутIацIун. ХIакьину, яни апрель зурул мяйнний, янилун дагьунни Хъюйннал сунув дараччи-тIутIив. Да дияхха цирдагу царай ранг-рангсса чIапIащалсса. ТIутIал дянивсса хъахъисса бурхьнимур базулулгу хъиннура тIутIив чIюлу дуллай дия.

ТIутIив тирх тIун диркIунни, инсантурал шаппасса ятту-гъаттарагу гьухъалданийн був­ккунни. Амма дараччи тIутIив тирх учирчагу, щюллишиву утти­гу диялну ялун къалирчунни. Бувкссару жува интнийн!