Студентътурал-волонтёртурал штабрал хъунмур Альбина Ажубова лайкь хьунни кIира ларайсса бахшишран.
Жагьилтурал кьини Дагъусттаннал БакIчи Владимир Васильевлул Барчаллагьрал чагъарду буллунни коронавирусрал фронтрай хьхьичIун ливчуминнан,
медициналул колледжирттал ва вузирдал студентътуран-волонтёртуран. Миннавух бия Дагъусттаннал медициналул университетрал лечебный факультетрай дуклакисса Альбина Ажубовагу.
ПатIимат Рамазанова
Ва Республикалул клиникалул азарханалийсса (ГКБ РД РКБ) волонтёртурал штабрал хъунмургу бур. Аьрасатнал Президент Владимир Путиннул указрайн бувну, Альбинан дуллуну дур «Мы вместе» тIисса щалвагу Аьрасатнал лагрулийсса акциялуву хьхьичIунну гьуртту хьуминнавухсса медальгу. Альбинал нину-ппу, ХIамдуллагь ва Гулзада, 1-мур ЦIувкIратуссар. Ттущалсса ихтилатгу Альбинал байбивхьунни гьамин нитти-буттахьсса барчаллагьрал мукъурттия.
— Ттунна кIулши хьуния тинмай хIакин хьунна тIисса хиял буссия ттул, шинну наниссаксса му гъира цIакь хъанай бия ттуву. Цуксса захIматсса ххуллу бухьурчагу, ци дайшишрурду хьхьичIун дагьларчагу, нава хIакин хьун аьркинссара тIисса зуву дия. Ттун бувчIлай бия му хиялданучIансса яла къулаймур ххуллугу цIакьсса ва куртIсса кIулшивурттайхчIинсса бушиву. Коронавирусрал азар ппив хъанай дайдишайхтурив, чIявусса студентътурал ккаккан бунни оьрчIнияцIава цIакь хьусса рувхIанийсса гьанурдал бияла азгъунсса бушиву. Гьаннайсса, чIявусса студентътал, хIучI къаувкуну, бувххунни азарданул цIаравун. Шаппа ттухва нигьачIисса группалувун багьлагьисса нину-ппу ялугьлай бусса кIулнува, кIункIу хьура нагу нава бучIи лякъиннийн. Барчаллагьрай бура нава хIакиннал пиша язи бугьайнигу, волонтёрну азарханалийн гьансса хIукму шайнигу манеъшиву къадурсса нитти-буттайн. Ттун хъинну ххуйну бувчIлайгу, чIалайгу бия миннан цукун къабигьану буссарив нава итабакьин.
Та аварасса ппурттуву, волонтёртал биял къахъанай, Альбинайн бувккун бур Республикалул клиникалул 2-мур азарханалул хъунимигу. Волонтёртал кIибачIин багьну бур, цавай тиккува Республикалул клиникалул азарханалий бивтун, тайми – Альбина цуппа каялувчину кIилчинмур азарханалийн гьан.
-Нигь ду-дакъашиврул пикри байсса чIун дакъая, жух азарханардай ялугьлай бия кумаг аьркинсса къашайшалт. Жул даврил гьанумур мурадгу медперсоналданул даврицIун кабакьаву, миннан жущава шайсса кумаг бувавуя. Жу давление, пульс, оьттувусса кислородрал тагьар (сатурация) ххал дуллай буссияв, мукунма инсаннал ссихI бигьаврил хъирив бавцIуну, ми процедурарттайн, аьркиннийн биян баврилсса, буцаврилсса буллай, зат дукан буван багьлагьиминнан дуканмур дуллай. Нех дирхьуну тIиссакссагу, къашайшалт азарханалийн нанисса та ппурттуву хIакинтурал гьарцагу минутI кьиматрай дия. Ва ялагу, къашайшалал къюкI дарцIуну, мунал къюкI зузи дуван массаж буллалисса хIакинтал баххана бувайссия, иш багьтари, хIакиннан цанмалу къашайшалал къюкI зузи дуван захIматссар, жугу хIала буххайссияв.
Жулва хIарачатрайну къашайшала ччаннай ацIлай ушиву чIалачIаврияр хъуннасса тирхханну чув дуссар! Мукунсса чIумал чан- кьансса пахругума багьайва дакIурдивун, жува бучIи лякъавриятусса, хIарачатрал хIасиллу къашайшалтнияргума жува ххари хъанахъисса душивриясса. ЖучIава хъин хьусса инсанталгу жул, гъан-маччами кунма, дакIурдил лавсунни бусса.
Альбина дакIнихтуну барчаллагьрай бур цанма чIявусса затру лахьхьин бувсса медициналул зузалтрайнгу.
— ЛичIинува дакIнихтунусса барчаллагь учин ччай бура Медуниверситетрал ректор, профессор Сулайман Маммаевлухь, шайкун студентътурал-волонтёртурал чIарав ацIаврихлу. Ва ялагу, жул даврил ялув бавцIуну бивкIсса хIакинтурал волонтёртал сайки хIадурнувасса хIакинтал бур тIисса лахъсса кьимат бищавугу – му Сулайман Нураттиновичлунгу, циняв преподавательтурангу бивщусса лахъсса кьиматри. ДакIнихтуну барчаллагьрай бура жард къакуну зий бивкIсса волонтёртурайнгу.
Альбина Ажубовал увкумунийн ххи бавияв, бусрав-барчаллагьрай занакьулу хъанахъавугу хасиятрал ца яла ххуймур лишанни куну. Нитти-буттахь, архIал зий бивкIсса волонтёртурахь, хIакинтурахь, медуниверситетрал хъуниминнахь барчаллагь тIутIавугу Альбинал тарбия аьлтта чIалачIи дуллалисса чаннал парди.
На барча буван цичIанма оьвчайхту, Альбинал гъалгъа лакку мазрай буваннув, оьрус мазрай буваннув увкукун. «Шагьрулий хъунма хьусса вин лакку маз ххуйну къакIулхьунссар», — увкуссия.
«На лакку душрахха, жул кулпатраву лакку мазрал кьиматгу, хIурматгу буссар, ичIува лакку мазрай бакъа ихтилатгу къабувайссар!» — дия жаваб.
