ЛичIи-личIисса давурттай, жаваблувсса къуллугъирттай зий, пишакаршиврул даражалийну цивппагу жяматран бусрав хьуну, шяраваллил цIагу лайкьну дуручлачисса инсантал ЧIяйннал шяраву чансса бакъар. Мукунминнавасса цану ур захIматрал ветеран ЯхIия Камиловгу.

Андриана Аьбдуллаева
Ванащал на уттигъаннура кIул хьусса, амма чIярусса шиннур ванал арс Арсен кIулну. Ва жул кулпатрал чIаку хъамаличури. Мудангу ясир бара ва жагьилнал мяърипатрал, уздансса тIул-тIабиаьтрал, ас-намус бушиврул. ЯхIиянащал кIул хьуну махърив ттун бувчIунни укунсса бу­ттал тарбия увсса арс цамур куццуйсса икIан къабюхъайшиву.

Ихтилат багьсса кIанай ттунма кIулсса чIяйнналгу бувсунни ЯхIиянал ваймигу оьрчIру ххуйсса тарбиялул бушиву.
ЯхIиянал ппу Кьасим чIярусса шиннардий ЦI. Макьаевлул цIанийсса ЧIяйннал колхозрал бригадирну ивкIун ур, нину Садижат ичIаллилсса, оьрчIалсса буллай, ужагърал гъилишиву дуручлай бивкIун бур. ЯхIия кулпатраву дянивма оьрчI ивкIун ур. 1966-ку шинал ЧIяйннал школагу къуртал бувну, ва лавгун ур Совет аьралуннаву къуллугъ бан. Зана хьуну махъ увххун ур МахIачкъалаллал шяраваллил хозяйствалул техникумравун.
Техникум къуртал бувну махъ тIайла увккун ур зун «Къизляррисводстройрал» 14-мур ПМК-лийн. АцIния мукьра шин дурну дур ва ца кIанай зий – мастернал къуллугърая айивхьуну, участокрал хъунаманайн ияннин.
Зий унува, ЯхIиянал къуртал бувну бур Новочеркасскаллал гидромелиорациялул институтгу.

1985 шинал участокирттал дянив цалчинсса кIану бувгьуну, ванан буллуну бур «Жигули» машинагу, Дагъусттаннал профсоюзрал обкомрал чулухасса грамотагу.
1993 шинал ЯхIия тIайла увккун ур хъунама пишакарну Къизлардал райондалийсса «КIилчинмур пятилетка» колхозрайн. Шикку хъунама гидротехникну зий арулла шин дурну дур. Ва даврийгу ЯхIия лайкь хьуну ур личIи-личIисса наг­радарттан.
1993 шинал зун ивкIун ур Къизлардал ЖКХ-лул комбинатрай.
Аьмну 40-нния лирчусса шинну хьуну дур ванал личIи-личIисса давурттай зий, хьхьичIуннайсса ккаккияртту хьун дуллай.
Цуксса цалла даву ххирасса дунугу, бюхъайва ЯхIиянаву вакссава гъирагу, гьавасгу къабикIан, шаппа цаннан ца бувчIлачIисса, нахIу-хIалимсса къуш ялугьлай къабивкIния. Адаминавун гьавас бутан, му лахъа-хъун ан хъунма­сса бияла кулпатрахь бикIай. ЯхIиянан талихI хьуну бур ххаллилсса оьрмулул дус бакIрайн багьаврийнугу.
Зулайхат чIярусса шиннардий зий бивкIун бур Къизлардал ИФНС-рай хъунмур бухгалтерну. ХIайп, ва ччяни дунияллия лавгун бур. Къабигьану бивкIун бур ЯхIиянангу ва къюву лялиян дан.

Шиккува бусан ччива ца укунсса затгу. Зулайхат дунияллия лавгун махъ сайки гьарца шинах ЯхIия учIайва жул редакциялийн, га дакIнийн бутлатисса бю­ххансса ххару чивчуну. Вай кьамул бай­сса жул зузалал учайва: «Цукссава ххуй­сса инсан биявав га хъамитайпа, ванаща ва цукунчIав лялиян бан бюхълай б­къар», — куну. Вайнная бивзун бур цахава лавхьхьусса, лайкьсса шанма оьрчI. Душ Тамара зий бур МахIачкъалаливсса диагностикалул центрданий. Хъунама арс Кьасим чIярусса шиннардий зий ивкIун ур хьхьичIунсса пишакар-экспертну, отделданул хъунаману Къизлардал ИФНС-рай, цIана цала предприятие тIиртIуну ур. Арсен зий ур УФСИН-лул конвойрал отделданул хъунаману. Ххирасса кулпат бакъасса къумашиву дакIния лаглай дакъанугу, хIакьину ЯхIия ххарину ур мудан чIаравсса ссурваврая — РахIиматлуя, ХIурияя, Ххадижатлуя. Ххарину ур арсурваврал хъанния.
Укун буслай бур ЯхIияная вайннал шяравучутал.

Загьиди Аьбидов:
— ЯхIия ххаллилсса агьлу-авладраясса оьрчIри. Ванал ниттиуссу Аьвдуссалам Туркманнаву сий дусса инсан ия. Райкомрал секретарьтурал, райисполкомрал председательтурал дусшиву дикIайва ванащал. ЧIявусса инсантурал чIарав авцIусса, ка-кумаг бувсса адаминар. ЯхIиягу мукунасса ур. На шярава лавгсса чIумал, ва школалий дуклакисса чIивисса ия. Баллан бикIайва ххуйну дуклакисса, спортраву итххявхсса оьрчI ур тIий. На хъиннува ххуйну кIул хьуссара ванал къушлищал вай Къизлардайн бивзун махъ. Вагу, ванал кулпат Зулайхатгу Къизлардай хъинну бусравну бикIайва.

Шалласу Шалласуев:
— ЯхIия ккавккукун, на ххари шара. Жул оьрчIшиву цачIу ларгссар, тай чIунну дакIнийн дагьай ва хьунаавкьу­сса чIумал.
Мукьра-ххюра шинай жу цачIу дуклай бивкIссару. ЯхIия цила чIумал спортраву хьхьичIунсса гьурттушинна дуллай ивкIссар. Куклу атлетикалуву, ттуплий уккан гьунар бусса икIайва. Ва ххаллил­сса, жяматраву бусравсса нитти-буттал арсри. Цувагу гьарца чулуха хIарачат бу­сса, захIмат ххирасса инсанни.
ЛичIи-личIисса жаваблувсса даву­ттай зий хьхьичIунну ивкIссар мудангу. ХIакьинусса кьинигу шяраваллил жямат­рал дуллалисса цинярда давурттавух чялишну гьуртту шайссар вайннал кулпат.