Январь зурул 12-нний, Прокуратуралул зузалтрал пишалул кьини,– Ягужинскийл медаль ларсунни чIярусса шиннардий прокуратуралул органнаву зий хъунмасса захIмат бивхьусса зузала, Гъумучатусса Анвардул арс Юсуп Сулаймановлул.
Шиккува кIицI лаган, Ягужинский Аьрасатнал цалчинсса генерал-прокурор ивкIссар, цувагу Петр 1 ивтсса. Ягужинскийл цIанийсса медаль цIакь дурссар 2017 шинал декабрь зуруй.
Дагъусттаннай зузисса прокуратуралул зузалтрава ва награда хьхьичIра-хьхьичI лайкь дурну дур жула лаккучунал. Му ккалли бан бучIисса ишри.
Юсуп Сулайманов къакIулсса нажагьсса бухьунссар лакраву. Ва зий ивкIссар шаннагу лакрал районнай. Прокуратуралул органнай зий ур 1986-ку шиная шихунай. Зун айивхьуну ур Ккуллал райондалул прокуратуралий следовательнал къуллугърай. 1991 шинал ивтун ур Лакрал ва Ккуллал районнал цачIусса прокуратуралий прокурорнал кумагчину. 1993-2006-ку шиннардий зий ур миккува прокурорну.
2006-2015-ку шиннардий ивтун ур ЦIуссалакрал райондалул прокурорну. ХIакьину зий ур Хасавюртуллал райондалул прокурорнал хъиривчуну.
Юсуплун дуллуссар ДР-лул лайкь хьусса юристнал цIагу, ва хъанахъиссар прокуратуралул ветерангу.
Барча тIий буру Юсуплухь хъинну сий дусса награда – Ягужинскийл медаль. ЦIуллушиву дулуннав!
Андриана Аьбдуллаева
