«Райондалул жагьилтал терроризмалийн ва экстремизмалийн къаршину» тIисса акциялул лагрулий бигьалагай гьантрай Гъумук хьунни Лакрал райондалул жагьилтурал иширттал,
спортрал ва туризмалул завалунсса аьдатравун дагьсса, волейболданул турнир. Гьуртту хьунни муний мяйра команда: кIира Ккуллал райондалул – Ккуллал ва Вихьуллал; ряхра Лакрал райондалул: Читтурдал, ЧIурттащиял, Ххюлуссуннал, Гъумучиял цIулещандувултрал, оьрчIал ва чIаважагьилтурал спортшколалул ва Гъумучиял волейболданул ветерантурал.
Зулайхат Тахакьаева
Бяст-ччаллий ххув хьунни Гъумучиял волейболданул ветерантурал команда, кIилчинмур кIану бувгьунни ЧIурттащиял командалул, шамилчинмур кIану – райондалул цIулещандувултрал командалул.
Турнирданул сакиншинначитурал чулуха барчаллагьран лайкь хьунни волейболданул ветеран Макьсуд Макьсудов.
«Яла ххуйма» волейболистну хIисав унни ветеран МахIаммад ТIагьиров, «Тамашачитурал чулухасса бахшишран» лайкь хьунни ЧIурттащиял командалувасса Марат Кьурбанов, «Ххувшаврийн хъит тIутIаврихлу» тIисса бахшишран лайкь хьунни цIулещандувултрал командалувасса Минкаил Куяев, «Яла тIайлама судья» хьунни Читтурдал шяраватусса Насир Гъапуров, «Яла ххуйма болельщик» хьунни ЧIурттащиял шяравасса Нажмуттин Ханов.
Ххув хьусса командарттан ва хьхьичIунсса буккултран сакиншинначитурал чулуха буллунни дипломру, арцуйнусса бахшишру ва хъамакъабитулунсса ссайгъатру.
Бахшишру ва дипломру буллай ия Аьрасатнал МВД-лул «Лакский» МО-лул каялувчи Юсуп Амиров.
