МахIаммадлул арс Абачараев Муса
Уттигъанну аьпалухьхьун лавгунни ххаллилсса лаккучу, техникалул элмурдал доктор, профессор, АьФ-лул ва ДР-лул лайкь хьусса элмийсса зузала, Ххюлуссуннал шяравасса МахIаммадлул арс Муса Абачараев.
Увну ур Муса 1937-ку шинал март зурул 7-нний Ххюлуссуннал шяраву. Каспийскаллал 1-мур школагу къуртал бувну, ца шинайсса «Дагдизель» заводрай зийгу ивкIун, увххун ур Ленинградуллал политехнический институтравун. Мудангу элмулух гъира бусса Муса, институт къуртал бувну махъ, зун ивкIун ур Ленинградуллал Жамирду бай институтрал филиалдануву (махъ Дагъусттаннал политехнический институт).
1972-1988-ку шиннардий Политехнический институтраву кафедралул доцентну ва заведующийну ивкIун ур, архIала ДНЦ РАН-лул физикалул институтрал отделданул заведующийнугу зий.
Муса ия Дунияллул халкьуннал дянивсса транспортрал академиялул академик, 160 элмийсса даврил ва 18 патентрал автор. ХьхьичIунсса аьлимчу хIисаврай ва гьуртту хьуну ур дунияллул халкьуннал дянивсса личIи-личIисса конференциярттай ва выставкарттай. Миччагу цала изобретениярттахлу мусил ва арцул медаллу ларсун учIайсса ивкIун ур. Муса хъанахъиссар гьавагу чапал къабувну гъилишиву дулайсса ччуччиялул автор. Ва изобретениялухлу ва лайкь хьуссар Мусил медальданун. Муса элмулул ххуллий чIярусса ккаккияртту чIалачIи дурсса аьлимчуя. Ва ия жяматран бусравсса инсан. ЧIярусса шиннардий уссия Каспийскаллал Хъунисриннал советрал председательну. Цала кулпатращал, Мисайщал, вайннал тарбия бувссар шанма оьрчI. Вайгу циняв бутта кунма, элмулул ххуллийх лавгунни. Абачараевхъал кулпат бур инсантуращал хIал бавкьусса, яхI-къирият дусса, цила бикIайкунсса интеллигентътурал кулпат.
Муса аьпалул шаврил кьурчIишиву кIидачIлай, жижара буллай буру кулпатрахь, арснахь, душваврахь, цинявппагу гъан-маччанахь. Имандалий лавгун лякъиннав, Алжаннул ххари аннав.
Ккурккуллал, Ххюлуссуннал, жяматру
МахIаммадлул арс Мусаев ХIусайн
Апрельданул 7-нний ахиратравун лавгунни жула республикалий чIявучин ххуйну кIулсса, агьали пенсиялул щаллу баврил аралул ца яргсса специалист, ас-ламусрал увччусса ххаллилсса лаккучу, захIматрал ветеран, АьФ-лул Соцобеспечениялул лайкь хьусса зузала Мусаев ХIусайн МахIаммадлул арс.
ХIусайн увну ур 1945-ку шинал МахIачкъалалив. Армавирдай ванал бувккуну бур Юридический техникум. Хъирив къуртал бувну бур «Международный институт управления бизнеса и права».
ЗахIматрал ххуллу байбивхьуну бур Буйнакскаллал райсобесрай инспекторну зий. ЧIал къавхьуну хьуну ур хъунама инспектор. Бажар бусса, итххявхсса специалист хIисав хьуну, увцуну ур министерствалул пенсияртту, пособияртту бишай отделданийн. 1980-ку шинал ХIусайн ивтун ур министерствалул контрольно-ревизионный отделданул хъунаману.
Муния махъ, пенсиялийн укканцIа, зий уссия цала дакIнил лавсъсса пишалий.
ХIусайн шамийла лайкь хьуну ур «Лучший инспектор Министерства соцобеспечения ДАССР» тIисса цIанин.
ХIусайн аьпалул шаврил хъуннасса кьурчIишивугу кIидачIлай, жижара буллай буру ванал кулпатрахь, арсурваврахь, душнихь, щалагу агьлу-авладрахь.
Умуд бур ва мубараксса Рамазан зуруй кулпатрахьхьун, оьрчIахьхьун Заннал ссавур дулунссар тIисса.
Цал рухI хъинний дишиннав, алжаннул ххари аннав, гьав нурданул дуцIиннав, махънал оьрмурдай барачат бишиннав. Амин!
Хьурттал жяматрал цIания Щайхмурадов Идрис
Кьурбаннул душ ХIусманова ПатIима
Ва мубараксса Рамазан зурул дайдихьулий, апрель зурул 3-нний, 97 шинал оьрмулуву ахиратрал хьунни ЧIяйннал жяматрал дянив хъунмасса хIурматгу, кьадругу хIалал бувсса инсан, Гъазлахъал Кьурбаннул ва Марияннул душ ХIусманова ПатIима.
ПатIима бувну бур 1925-ку шинал Аьштти-Ккуллал махIлалийсса ЧIяйннал шяраву хIалтIухъаннал къушлий. Кулпатраву оьрмулул хъунмургу бухьувкун, ва гиччава найбуна аьдат хьуну бур захIмат ххирану, мюрщими уссу-ссурвавралссагу буллай.
Дахьра сакин дурсса ЧIяйннал колхозраву байбивхьуну бур ПатIимал захIматрал ххуллу.
1943-1944-ку шиннардий ва зий бивкIссар захIматрал фронтрай – СулакьрачIасса, ЛенинкантуллачIасса мюхчаншиврул къанаврттай.
1947-ку шинал, цила ссурахъу ХIусманов Ризваннущал ташугу бувну, сакин бувссар ххаллилсса кулпат. Ризван ХIусманович (аьпа баннав цал) оьвхъусса муаьллим, хьхьич1унсса зузала ивкIссар – ванал канила дукъаккайсса даву дакъассия. Ласнаха лавхьхьуну ПатIимагу ужагъ нани бувну бивкIссар мудангу. «Жула Ризван, жулва ПатIима» бакъа къаучайссия вайннайн щалагу жяматрал дянив, дугъришиврул ххуйшиврул бутIа ххину буллусса инсантал буну тIий.
Ххаллилсса тарбиягу дуллуну, вайннал лащу-щаллу бувссар ххюя арс ва кIива душ. ОьрчIругу мюрщину бунува, цала захIматрацIух, пяп-чарил давугу цалла дуллай, Ризваннул ва ПатIимал дурссар цIусса къатригу.
Ккашилнал лякьагу, мякьнал кьакьаригу кIулсса хъамитайпа буссия ПатIима. Ванил бувсса захIматран кьимат бивщуну, дуллуссар медаллу: «За оборону Кавказа», «За победу над Германией», «Ветеран труда» ва м.ц.
ПатIима ахиратрал шаврил пашманшивугу кIидачIлай, дакIнийхтунусса жижара буллай буру ссихь Ажихь, арсурваврахь Зияуттиннухь, МахIаммадлухь, Аликлухь, душваврахь ХIавахь, Зугьрахь, ХIусманхъал агьулданухь, мачча-гъаннахь.
ПатIимал бунагьирттал аьпа баннав, алжаннул ххари баннав. Ванил барачат махъ ливчIун лякъиннав!
ЧIяйннал жяматрал цIания
Шалласу Шалласуев
АхIмадил арс АхIмадов ХIанапи
Оьрмулул 87 шинаву ахиратрал хьунни цала оьрму Вихьуллал колхозрал давурттан харж бувсса багьадура, щалагу жяматрал дянив бусравсса, ххаллилсса чув-адамина, АхIмадил арс АхIмадов ХIанапи.
ХIанапи увссар Вихьуллал шяраву 1935-ку шинал. Ванал оьрчIшиву тIайла дарцIуссар Хъун дяъвилул шиннардийн. ХIанапил къуртал бувссар Вихьуллал шяраваллил школалул 7 класс. Яла бувккуссар Буйнакскалий трактористътал хIадур бувайсса курсру. Зунсса мажал къавхьуну, 18 шинаву увцуссар аьралуннаву къуллугъ буван. ХIанапи къуллугъ буллалисса шиннугу тIайла дарцIуссар 1956-ку шинал Венгриянаву хьусса иширттайн. Ва усса частьгу гьуртту хьуссар тай иширттавух. Армия лавхъун махъ зий ивкIссар Ккуллал райондалул киносетьрал шоферну, яла, 1960-ку шиная шийнай, зий ивкIссар Вихьуллал колхозрал шоферну, колхоз цурда духлаганнин. Вихьуллал колхозрал Бабаюртливсса, Бажиганнайсса, зунттавусса ххуллурду битлай бувсса захIматрал сияхI дуван къабигьар. Му бакъагу, шяраву машинартту чансса чIумал, инсантуран аьркинмургу дузал дувайссия ванал.
ХIанапи цимилгу лайкь хьуссар колхозрал, райондалул чулухасса бахшиширттан, барчаллагьирттан. Ва ия ЗахIматрал ветерангу.
ХIанапи ахиратрал шаврил кьурчIишивугу кIидачIлай, жижара буллай буру ванал кулпатрахь, арс-душваврахь, махъсса цинявппагу гъан-маччаминнахь. ХIанапи паракьат хьуния нур дизаннав, аьпа буваннав. Амин!
Вихьуллал жямат
