[dropcap]В[/dropcap]ай гьантрай Дагъусттаннал университетрал ректоратрал конференц- залдануву «Жула чIумул вирттал» тIисса акциялул лагрулий лахъа- хъун бунни республикалийх кьини дурксса,
коронавирусрал пандемия сукку хьусса захIматсса чIумал чувшиву ва жаваблувшиву ккаккан дурсса вирттал – ахIвал кIюласса кулпатирттан, кьатIув буккан къахъанахъисса бугьарасса ва мушакъатсса инсантуран кумагру буллай бивкIсса волонтертал, ишбажаранчитал, медициналул зузалт.Цалла цIуллу-сагъшиврун нигьачIаву душиврух къабурувгун, вайннал республикалул шагьрурдайсса ва районнайсса цикссагу кулпатирттавун биян бувссар дуки- хIачIия дусса кьуцуртту, азарханардайн – СИЗ-ру.
Мажлисрай ихтилатру бунни акциялул сиптачитурал ва сакиншинначитурал, волонтертурал суккушиннардал каялувчитурал: МахIачкъалаливсса «Аьрасатнал нинухъру» тIисса жяматийсса суккушиндарал председатель Сефижат МахIаммадрасуловал, Дунияллул халкьуннал дянивсса исламрал бизнесрал ассоциациялул вакил Разита Мушидовал, Аьрасатнал «Знание» обществолул Дагъусттаннайсса отделениялул директор Саэд Ниналаловлул, «Вирттал» тIисса лакрал жагьилтурал суккушиндарал председатель Давуд Амировлул ва м.ц. Ва кьини наградартту дуллунни 150-нния ливчусса къучагътуран.
Андриана Аьбдуллаева
