Цимирагу шинал хьхьичIра дайдирхьусса ва шиная шинайн цIакь хъанахъисса аьдатрайн бувну, МахIачкъалаливсса ва чIаххуврайсса шагьрурдайсса лакралХхувшаврил байран дайдишай МахIачкъалаливсса АхIмад-Хан Султаннул гьайкалданучIа тIутIив дишаврийну. Гьар шинах кунма, ва базилухгу чIявусса агьлу бавтIун бия гьайкалданучIан.
ПатIимат Рамазанова
Цалчинмур ЦIувкIуллал Жяматийсса советрал председатель, профессор ХIусайханов МахIаммадбаглул агьали барча буллалисса ихтилатраву кIицI лавгуна хьхьичIра ва кьини хъун дуван тамансса ветеранталгу батIайсса бивкIшиву, фронтовиктурал кьюкьри ххялтIа дуклай душиврийн бувну, батIавугу цал архIал ххарисса ва кьурчIисса байран хъанай душиву.
Агьали барча буллалисса ихтилатру бувна Мариян Илиясовал цIанийсса «Дараччи» фондрал хъунмур Гульшан Хасаевал, вава фондрал Москавлиймур филиалданул хъунмур Мариян Кьаландаровал, халкьуннал шаэртал Ссугъури Увайсовлул ва Космина Исрапиловал, профессор АьвдурахIман Халиловлул, журналист Гьарун ХIасановлул, АхIмад-Хан Султаннул маччачу Сайдун ХIажикьурбановлул. Поэзиялул театрданул директорнал хъиривчу Супиян Оьмаровлул бувккуна цалва чивчусса шеърирду.
Виричунахасса ва Ххувшаврил санаъ дуллалисса шеърирду бувккуна дуклаки оьрчIалгу.
ГьайкалданучIасса митинг къуртал хьуну мукьах цалчинмур ЦIувкIуллал шяраваллил активистъталгу, «Дараччи» клубрал вакилталгу лавгуна 1-мур ЦIувкIратусса фронтовик, полковник СантIуев Аьлил барча уван ваначIан шаппай.
ЦIувкIуллал шяраву сагъну ливчIсса махъа-махъсса ветеран барча уван бувкIуна Дагъусттаннал БакIчинал ва ХIукуматрал администрациялул паччахIлугърал къуллугърал ва паччахIлугърал наградартталсса буллалисса управлениялул каялувчи Артур Исрапилов ва Кировский райондалул хъунама СалихI Сагидовгу.
