[dropcap]И[/dropcap]нтдайдихьулул гьантрай цинярдагу лакрал щархъаву кIицI лаглан бикIай хъу-лухччинул давурттан дайдихьу дуллалисса Хъарас щаврил байран.Яргну, тяхъану ларгунни Хъурдуккаврил байран Ккур­ккуллал шяравугу. Дарусса, даркьусса хьунни кьинигу.

---

Андриана Аьбдуллаева
Щар дурцIуну дия шагьрурдая байрандалийн бувкIсса ккур­ккуллал ва лагма щархъаясса хъамаллурал. Ккурккуллал жяматрал байран барча дан бувкIун бия Лакрал райондалул бакIчи Юсуп МахIаммадов, мунал хъиривчутал Абакар Къюннуев ва Амсаруллагь Къажлаев, райондалул КIулшивуртту дулаврил управлениялул хъунама Явсупа ХIамзаев.

Гьашину хъарас щилай ия Мурад Дибиров. Дибировхъал кулпат Ккурккуллал жяматран бусравсса, хIал бавкьусса кулпат­ри. Мурад цумур-цагу даврил сант кIулсса, гьарнан кумаг бан хIадурсса уссар. Ванал кулпат Зугьра, МахIачкъалаллал 11-мур гимназиялул директор, хIурматрай бур цила коллективрал дянив. Вайннал Хъарас щусса шин буллугъсса, барачатсса хьун аьркинссар тIий, мукIруну бия ккурккул. Нюжмардул хьхьичI увкIунни Мурад шяравун байран дантIисса кIанттурду лазилакьи бан, гъарая, бургъия мюхчан хьун бивщуна чятирду, дурцуна щин.

Мажлис байбихьлай, жямат барча буллалисса ихтилат бунни шяраваллил аксакал Даниял Магьдиевлул. Хъирив, Хъузала хьхьичIну, жямат бувккуна къурув хъарас щун. Байрандалул яла хIазмур лахIза ва бикIай. Шин буллугъсса, бакIлахъия авадансса шайссар тIий, хъарас щилай, гьанна бишлашисса Хъузалайн ва кувннайн кув щинну рутIлай булукьай. Хъарас щуну махъ байбивхьуна лечаврил, турникрай гьаз шаврил ва цаймигу спортрал бяст-ччаллу. Ххув хьуминнан дуллуна бартри, медаллу ва Хъузалал ва мунал гъан-маччанал чулухасса арцуйнусса бахшишру.

Шяраваллил школалун Хъузалал бахшиш дунни спортрал кьай-кьуй. Муния махъ циняв­ппа щябивкIуна буллугъсса ссупралух. Шикку Хъузалал лахъа-хъунну тапшур бувна ялунсса кьуру ххаллилсса нитти-буттал арс, Москавлив ялапар хъанахъисса ккарччал хIакин, Гъужибу­тта Аьлиевлуйн.
ХIурматлувсса ккурккуллал ва бусравсса хъамаллурал ихтилатру къуртал хьуну мукьах­сса ссувхIатрал хъиннува тяхъа буккан бувна жямат. Байран, махъ бакъа, дакIний личIансса хьунни.