Аьралий операция нанисса кIанттурдая ссалам

ЦIуссалакрал райондалия чансса бакъар хасъсса аьралий операциялуву гьуртту хъанахъисса. Миннавасса ца, Мухтар Шайхаьлиев, аьралий операция нанисса кIанттурдая ватанлувтурахь ссалам буслай ур. Увну ур Мухтар ЦIуссалакрал шяраву. Шиккува къуртал бувну бур школа. Мунияр махъ лавгун ур аьралуннаву къуллугъ бан. Шикку лархьхьуну дур автомеханикнал касму. Хасъсса аьралий операциялуву гьуртту хьун гьаннин зий ивкIун ур ЦIуссалакрал райондалул бакIчи Сулайман Рамазановлул щупIирну.
Цала даврил уртакьтал А. Оьмаров ва М. МухIадов Донбассуллал халкь буруччин лавгукун, Мухтардунгу миннал хъирив гьан пикри хьуну бур. Ванал ччя-ччяни оьвчай райондалул бакIчинайн, бусай Донбассуллал халкьуннал тархъаншиврул цIаний талатисса жула аьралитурал чувшиврия.
«Шикку хъиннува бувчIай оьр­мулул гьарицагу лахIзалул кьадру-кьимат. Жу бусса кIанттурдай жущара дукра дан шайсса, лази-лакьаву дуруччин шайсса шартIругума дур», – тIий, буслай ур Мухтар.

Интнил призыврал план щаллу дунни

Вай гьантрай Хасавюрт шагьрулул, Хасавюртуллал ва ЦIуссалакрал районнал аьралий комиссариатрая МахIачкъалаллал призыврал пунктрайн тIайла бувккунни аьралуннаву къуллугъ буллантIисса жагьилтурал ирглий­сса группа. ХьхьичIва кунма, уттигу вай къуллугъ буллантIиссар Аьрасатнал аьралий частирдаву 12 зуруй. Му чIун къуртал шайхту, занахьунтIиссар шаппай. ОьрчIру пунктрайн тIайла букканнин аьра­лий комиссар Абакар Давудовлул ва мунал хъиривчу Артур Аджиевлул дунни инструктаж, ихтилат бунни призывниктуращал ва миннал нитти-буттащал.
Бувсунни, срочниктал Аьра­сатнал цIусса регионнай, хаснува аьралий операция нанисса кIанттурдай, къуллугъ къабуллантIишиву. Ва зат хьхьичIва Аьрасатнал Президент Владимир Путиннулгу бувсъссия. КIицI лаган, ЦIуссалакрал райондалул ккаккан дурсса интнил призыврал план щаллу дунни. Призыврал кампания най дикIантIиссар июльданул 15-ннийнин.
ЦIана бувцусса жагьилтал Кьиблалул ва Баргъбуккавал аьралий округирттай къуллугъ буллан тIайла бувккун бур.

Щала пьедестал – цIуссалакрал гимнасткахъахь

ЦIуссалакрал райондалул ОьрчIал ва мюрщи жагьилтурал спортрал школалул (№1) чIава гимнасткахъал бувгьунни щала пьедестал Дагъусттаннал спортрал гимнастикалул первенстволий.
Первенство хьунни МахIач­къалалив, майрал 13-нний. Шикку гьуртту хьунни ЦIуссалакрал райондалийсса ЦIуссаккуллал, ЦIуссалакрал ва Чапаево шярав­сса 12 инсан.
Вайннал бувгьунни первенстволий цинявппагу хьхьичIунсса кIанттурду. ЧIава гимнастка­хъул хIадур бувну бур тренертал А.С. ХIусайновал ва З.М. КьурбанмахIаммадовал.

ХьхьичIун­миннавух ия

«Образовательная среда – территория без экстремизма» тIисса кIулшивуртту дулаврил форумрал лагрулий республикалул КIулшивуртту дулаврил центрданий хьунни региондалул конкурсрай хьхьичIунсса кIанттурду бувгьуми барча буллалисса мероприятие. ДакIнийн бутан, баян бувну буссия жагьилтурал дянив экстремизмалул идеология ппив хьун къаритаву мурадрайсса методикалул материаллал конкурс. Шикку гьуртту хьунни Дагъусттаннал цинявппа школардаясса 100-нния ливчусса оьрчIру.
ЦIуссаккуллал 2-мур школалул дуклаки оьрчI Казанбиев Амирдул бувгьунни 2-мур кIану «Экстремизм дакъасса дуниял» тIисса номинациялуву.

КIилчинмур кIану бувгьунни

ЦIуссалакрал райондалиясса Аьйша Шуаьевал 2-мур кIану бувгьунни «Вирттаврал савлугърая пахрулий буссару» тIисса суратру дишаврил республикалул конкурсрай. Ванил каялувчи бия Пакият Гаппаева. КIицI лаган, Ххувшаврил байрандалул гьантрай республикалий хьунни цаппара конкурсру. «Вирттаврал савлугърая пахрулий буссару» тIисса сурат дишаврил, «СаллатIначIансса чагъар» тIисса сочинениярттал, «Ххувшаврил ххуллурдайх» тIисса методикалул разработкарттал ва «Ххувшаврил чIу» тIисса сценарий журалийсса балайлул конкурсру.

Опыт кIибавчIунни

Вай гьантрай ЦIуссалакрал райондалул КIулшивуртту дулаврил управлениялул хъунмур Светлана Кудаевал каялувшиннаралусса ЦIуссалакрал райондалул делегация гьуртту хьунни «Наставничество: эстафета знаний и опыта» тIисса республикалул форумрай. Педагогнал ва наставникнал шинан хас дурсса форум хьунни Буйнакскалий. Буйнакскаллал школарттал хьхьичIунсса учительтурал ккаккан бунни хъамаллуран мастер-классру, кIибавчIунни опыт ва кIулшивуртту. ЛичIи-личIисса регионнаясса учительтураща бювхъунни цала опытрая бусан, цIу-цIусса кIулшивуртту ласун, кувннал кувннащалсса арарду цIакь дан.
ХIадур бувссар
А. Аьбдуллаевал