[dropcap]Б[/dropcap]айрандалул дайдихьу дурунни Гъумук аьнтIикIасса Жагьилтурал парк тIитIаврийну. ЯтIул лента кьувкьунни Муса Маннаровлул,
Артем Здуновлул, Юсуп МахIаммадовлул ва Гъумучиял школалул дуклаки оьрчIал.
[dropcap]Ю[/dropcap]суп МахIаммадовлул дакIнийн бувтунни парк бувшиву «Единая Россия» партиялул агьали бигьалагайсса кIанттурдай къулайсса шартIру дузал давриха зузисса федерал проектрал лагрулий. Парк бан райондалул администрациялул личIи бувну бур ца яла язимур кIану – ВацIилу-Зунттуйн лажинну, БурхIай къалалийн ттиликIну бурувгсса, я чунмай битарчагу, караматсса тIабиаьтрал вив лавсъсса.
Лапва эмаратну чIалан бикIай хьхьувай, ВацIилу зунттуха барз бувккун нанийни. Паркрал лажин чулий чанна лархъун дур Лакрал райондалул карта, къинттуллух – исвагьисса фонтан. Тийнмайну бур спортран ккаккан бувсса майдан, чIал къавхьуну бан дакIний бур ОьрчIал чIиви шагьругу.
