Ларгсса нюжмардий Лакрал райондалий хьунни Хъаннил байрандалун хас дурсса шадлугъру.
ХьхьичI райондалул администрациялул актовый залдануву Юсуп МахIаммадовлул барча бунни администрациялий зузисса цинявппагу хъами. «Ччя-ччяни учин къашай жущава жулва ниттихъахь, кулпатирттахь, ссурваврахь, душваврахь, архIал зузисса хъаннихь барчаллагьрал махъру. Мунияту 8-мур Мартрал кьини зун ми махъру кIилий-шамлий хIалалссар. Ва цалчинсса интнил байрандалул кьини кунна чаннасса, ххарисса асардал бувцIусса хьуннав зул оьрмулувусса гьарцагу гьантта», — увкуна Юсуп МахIаммадовлул. Гьарцагу хъамитайпалун дуллунни тIутIив, ттигъанну МахIачкъалалив хьусса «Ттул Лакку аьрщи» тIисса концертрал дискру ва арцуйнусса бахшишру.
Юсуп МахIаммадовлухь, цивппа барча баврихлу бакъассагу, район хьхьичIуннай дан бувссагу, буллалиссагу захIматрахлу барчаллагь увкуна финотделданул хъунмур Аьйша Амирхановал.
Гара кьини райондалул Хъун клубраву хьуна магьирлугърал зузалтрал концерт.
Залданувун бавтIсса хъами барча буллай, Юсуп МахIаммадовлул кIицI лавгуна оьрчIал тарбиялулсса, ичIаллил кушулулсса баврицIун жяматрал оьрмулувугу хъаннил захIматрал бутIа ва бияла ххину-ххишаласса бушиву. Хъун дяъвилул шиннардий тIурчарив ми арамтуннал хъаргу цайнна ларсун бивкIшиву. ХIакьинугу чансса бакъашиву район хьхьичIуннай даврил цIаний гьарцагу аралуву дакI тIайлану захIмат буллалисса хъами. Му дакI тIайласса захIматран кьимат бишлай, райондалул гьарцагу идаралул кIи-кIива, шан-шанма зузала барча бан дуллуна тIутIив ва арцуйнусса бахшишру. Райондалул магьирлугърал къатлуву зузисса хъанниллив бахшишру хIалал дурну дия гьарцаннул, МахIачкъалалив Лакрал райондалул кьини лавайсса даражалий дан бувсса захIматрахлу барчаллагьран. Бувсуна Аьрасатнал цайми шагьрурдай ялапар хъанахъисса ватанлувтурал тавакъюрайн бувну, «Дагестан» РГВК-лул цIунилгу ккаккан дан тIий душиву шанна ссятрайсса щалла концерт (му ккаккан дуруна ххуллун кьини).
Хъирив райондалул магьирлугърал къатлул зузалтрал ва Гъумучиял магьирлугърал школалул дуклаки оьрчIал ккаккан дуруна авадансса концерт. Концертрай тIутIисса балайрду бия ниттихъан хас бувсса. Тамашачитуран яла-яла ххуй дирзуна ларгсса шинал цIудуккан дурсса «Гъази-Гъумучи» балайлул ва къавтIаврил ансамбльданул номерду. Унгу-унгусса бахшишну тамашачитуран хьуна аккордеондалущал Арслан Шагьмарданов сахIналийн уккаву. Вара концертрай ялун лирчунни цIусса цIагу – ЧIурттащиял шяраватусса ХIусманов Султаннул увкуна цалва мукъурттийсса ва макьандалийсса балай.
