[dropcap]Ч[/dropcap]Iяйннал шяраву школа тIивтIуну бур 1912-ку шинал. Муна му школа хIакьинусса кьинилийн бияннин ягухьуну, миву кIулшиву ласлай бур оьрчIру.
Гьай-гьай, гания махъ школа цимилгу бакьин бувну бур. ЧIарав дурну дур байбихьулул классирттансса школалул къатри. Жунма кIулсса куццуй, дукIуния шинмай Дагъусттаннал школартту бакьин буллан бивкIунни шяраваллал инсантурал кумаграйну ва хIукуматрал итадаркьусса арцуйну. ДукIу Ккуллал райондалий мукун бакьин бувунни Хъусращиял ва Ккуллал школартту. Вана гьашину мукунма бакьин буллай бур ЧIяйннал школа.
На уттигъанну, ва школа бакьин буллалисса давуртту чагъиравусса чIумал, хьунаавкьуссияв ЧIяйннал школалул директор ХIаммакуева Альбинащал. Ванил бувсуна ттухь шикку дуллалисса давурттаящал:
— Жу, гьашинусса дуккаврил шин къуртал шайхту, байбивхьуру школа бакьин буллай. «Точка роста» тIисса программалувух гьуртту хьуншиврул жуя тIалавшинна дия бакьин бан кIива класс, цивппагу 40 квадратрал метралияр чан бакъасса. Ми классру жу бакьин барду. Вай давуртту дансса материаллу ларсун дуллунни «Фонд Кая» тIисса жяматийсса организациялул. Давуртту цирдагу зузалт къабувгьунма, жула учительтурал, техничкахъал, оьрч1ал багърал зузалтрал дурссар.
— Зу таймигу школалул къатри дакьин дуллай чIалай бурухха?
— Тай къатраву буссар жул байбихьулул школа ва оьрчIал дукра дукайсса къатта.Гьашину Дагъусттаннай ккаккан дурну дия 150 школа бакьин буллансса программа. Му программалувун школа бутаншиврул аьркинну бия жувагу гьуртту хьун, яни арцу датIин. Ми арцу цирдагу дартIунни ЧIяйннал школа къуртал бувсса выпусниктурал. Ми хьунни 670 азарда къуруш. ВайннуцIун кумаг бунни Ккуллал райондалул администрациялулгу — дуллуни 100 азарда къуруш. Вай циняв арцу най диркIссар «Фонд Кая» тIисса счетрайн. Байбихьулул школалул къатри дакьин дуллай буру гьанулуцIатура. Давуртту дуллай буссар подрядчиктал. Дишарду жу мукунна школалий ва оьрчIал багъраву (оьрчIал багъ школалувун бухлахиссар) видионаблюдение, дихьлай буру цIу къадагьаншиврул занг рищайсса сигнализация, дишинтIий буру щин, даххана дувантIиссар школалул лагмасса чапар. ДувантIиссар цаймигу давуртту.
Аллагьнал кабакьирча, жу дакIний буру ялунчIин гъинтнил зурдардий гьашину бакьин буллалисса байбихьулул школалул къатраву тIитIин шагьрулул оьрчIанссагу, жула шийваминанссагу «Этнолагерь». Шикку, лакку маз лахьхьин баву дакъассагу, хIасул дуван ччай буру жула лакрал аьдатру дусса тIуркIурду ва цаймигу оьрчIан хIаз бизансса кунмасса ишру.
