[dropcap]В[/dropcap]ай гьантрай хъуннасса уттарашинна дия махъсса ацIра шинал мутталий диялну заэв дурксса 1-мур ЦIувкIуллал шяраву. АцIра шинал мутталий тIий, чIуручIав дуллалиссагу муниятура,
кувннаяр кув махъун къабагьан кунма, чIявусса кулпатру кIичча шагьрурдайн бивзунни. Райондалий душиву къакIулли ччясса мутталий ваксса дирисса бущилий ххялтIа дуркIсса цамур шяравалу. УрчIра- ацIра шинал мутталий шяравун къабивмигу, ца зумату кунма, шяравалу буниялттунгу ялгъузну лирчIун душиврия гъалгъа тIий бия.
ПатIимат Рамазанова
ДакIру ххари дуллай дия усттартурал кьутI-шутIлил чIурдал. КкурчIа машинарттал бувцIуну бия, машина бацIан бувансса кIанувагу ляхълай бакъар тIий бия. Дурусну ца дачIи шинал хьхьичI буттал шяравалу кIа даражалий душиву кьурчIи бизлазисса , шагьрурдай яхъанахъисса ЦIувкIуллал жагьилтурал хIасул дурна шяраваллил масъаларттаха зунсса ккуран. Вай жагьилтурал кIичIирттаву кобрарду дирхьуну, шяравалу чанна лахъан дурна. Чанная дайдирхьусса давугу барачатсса циван къадикIави!
[dropcap]В[/dropcap]ана уттигу мива жагьилтурал баян бувна, гьар шинах авгъуст зурул 1-нния тIайла хьуну « ЦIувкIуллал нюжмар» дуллантIишиву. «ЦIувкIуллал нюжмар» дуван шяравун бувкIун бия республикалул кьатIув яхъанахъисса цIувкIулгу. Санк-Петербурглив яхъанахъисса пагьламантурал цIанихсса Абакаровхъал наслулиятусса Мухтар Абакаровлуя тIайла хьуну. Жагьилтал кIюрххила кьюкьрайх бавчIуну булувкьуну зий бия: шяраваллил кьуллардаватусса щин тIайланна ххуллурдайн экьинай, кьаркру хъанай дуну тIий, аьрщарал лултту турбарду бихьлай бия. Сайки циняв кьуллардаватусса щин утти турбардавухри дачинтIисса. Бия буттахъал къатри цIу дуккан дуллай зузиссагу. На ЦIувкIрату ялавай нанисса кьини, ЦIувкIуллал шяравун буххайсса кIанай, Совет Союзрал КIийла Виричу АхIмад-Хан Султаннул сурат дусса улттул чIарав бия цIуну бувсса чарил кьуллагу. Та кьуллалувунгу щин дуцинтIиссар тIий бия — шяравун увхманал нахIала буваван. Жагьилтурал активист МахIаммад- Расул Оьмаровлул бувсунни аьмну ттурша жагьил увкIшиву шагьрурдая шяравун ва ми гъирарай зий бушиву. Бувсунни шяравунсса ва шярава Цумур щинайнсса, Бичи-Личчайнсса ххуллурдугу бакьин бувансса мурад бушиву.
— Буслай бусан къашайсса ххаришиву дур дакIниву, шяравалу утта дуккан дувансса нижатрайсса жагьилтурал бюхъу- хъит чIалай. Ялун нанисса никиран цивппа щил наслурив , цукунсса шяравату бувкссарив мудан кIулну бикIан аьркинссар. Ца ххуйну, уссурвал кунма, бавкьуну, тяхъану зий бур жагьилтал вай гьантрай. ЧIявусса мюрщи оьрчIру бур шагьрурдая бувкIсса. Уттигъанну ЧIарттал шяраву тIивтIунни оьрчIансса лагерь. Шяраву кIива-шанма лагерь буссаксса иш бур цIана жучIагу, шяравусса оьрмугу сайки тава лагерь бур, гьар кьини оьрчIру зунттавун занай бур, ратIув, неххайн занай бур, кьянкьа-кьурчIи шаврицIун, чIявусса асардал дакIру видуцIлай дур,вайннан тамансса затру лахьлай бур, — тIий бур ЦIувкIрав яхъанахъисса Уллубиева Бика.
