Уттигъанну цила оьрчIащал отпускалий Лаккуйн бувкIсса ттул душнил бувсуна, цищалла дусшиву дусса ца душнил ниттин хIакинтурал зунттал гьава маслихIат бувшиву.
Нанияра пикри баннуча ва иширал ялув. Бюхъай чIявуминнан ккавккун, бавну бикIан «Чендирчеро», тIисса кIану. Ттунгу бахтти хьуссар таних ябитан. Лавгссияв нагу тиккун Ахъушиял райондалун 80 шин хъанахъисса иширацIун бавхIуну макьала чичин. Хъинну ххуйсса инфраструктура хIасул дурсса кIану бия, сакин бувну бия гъинттулгу, кIинттулгу инсан игьалаган бюхъайсса кьяйда. Ялагу та кIану кIура бавну бия Ахъушиял райондалул чIяруми тяхъашивуртту дайсса кIанттайн.
Тукун хъунмасса турбаза къабарчагу, хьунссия жула Ккуллал райондалийгу буван цала -цала шяраваллал кIанай ягу аьмсса райондалул аьрщарай чIиви-кьивисса турбаза. Цал бакIрайва дан бучIия цаппара къатри. Ми къатригу хьунссия финнал журалул тIаннул къатрал лагрулийсса буван. Дарбантлив СССР дусса чIумал бикIайва «Дербент» тIисса муна му журалул турбаза.
Кьуя-зувия инсаннаща игьалаган шайсса къатри дуварча, яла хьунссия, чIявуссаннан къахьурчагу, мадара инсантурансса давуртту. Туристурансса дукия данмургу жула инсантураща ласласисса дикIанссия. Вагу жуламиннансса хайр хъанай бур.Укунсса давуртту дуван аьркинну бур инвестортал. Яртал, «Лакку билаят ххирассар» тIий, хъуни махъру къабуслай, ци-дунугу дуллай байбихьияра жула ший.
Ца чIумал Лаккуяту шагьрулийн нанисса машиналул шафернал бивхьуна лакку мазрайсса балай. Яла ттул чIарав щябивкIсса ца хъамитайпалул: «Лажинни, кьабикIу. Ми балайрдал буруча жу шяраву цIакь буллай», — куна. Бакъаривла балайлувусса махъругу, турбаза баврил чулинмайсса ишругу пикри бансса затруну.
Лажин хIадур дурссар ХIажимурад ХIусайновлул
