Ноябрьданул 28-нний Ккуллал шяравусса спортрал комплексраву хьунни Республикалул ка дишаврил (армспортрал) турнир. Му хас дурну дия Ккуллал шяравасса кIийла ка дишаврил дунияллул чемпион, Аьрасатнал «Заслуженный мастер спорта» цIа ларсъсса, лачIун уккаврил мастер, жяматийсса ишккакку, ахиратравун гьаннин Дагъусттаннал Халкьуннал Мажлисрал депутатну ивкIсса Оьмаров Чупалав Аьлил арснал аьпалун.
ХIажимурад ХIусайнов
Турнир дайдишин хьхьичI, Оьмаров Чупалав увсса, яхъанай ивкIсса къатрал чIирайн ванал цIа абад дуллалисса мемориал ула лачIун дурну махъ, хьуна чIявусса хъамал гьуртту хьусса митинг. Му тIиртIуна Ккуллал 1-мур школалул директорнал хъиривчу Маммаев Рамазаннул. Махъ буллуна Ккуллал 2-мур школалул директорнал хъиривчу Кьурбанов Кьубанчихьхьун. Ванал бувсуна, дуклай ивкIсса шиннардия айивхьуну, муданагу Чупалав эбратрансса жагьил ивкIшиву, ялун урган авкьатсса чурххал заллуну къачIаларчагу, дакIнивусса авкьатрал спортраву лахъсса шачIанттайн гьаз хьушиврия. Ца спортраву акъагу, Ккуллал райондалийсса дяъвилул ветерантуран, школа медаллайну къуртал бувсса оьрчIан мудан арцуйнусса бахшишру дуллай ивкIшиву, дакI хъинсса, ца цаласса къабувну, миллатралсса буллай, такну Ккуллал райондалул жяматийсса иширттавух гьуртту хъанай, цащава шаймур буллай ивкIшиву кIицI лавгуна. Бувсуна Чупалав яхъанай ивкIсса кIичIираваллин ванал цIа дирзшиву. Ванал чIивиниявасса дус ХIасан Аьлиевлул сипталийн бувну дуллалишиву бувсуна ва турнир. Махъру лавхъуна Чупалавл уссил Гьаруннул, кулпатрал Оьмарова Ларисал, турнир дачин дуван МахIачкъалалия бувкIсса Дагъусттаннал кару дихьулт_рал хъунама тренер Аьлибеков ХIажинал, турнирданул хъунама секретарь Рабаданов Батирдул ва цайминнал. Яла школалул оьрчIал мемориал улттул лув дирхьуна тIутIив.
Гания махъ хьуна ка дишаврил бяст-ччаллу. Ми най бия чурххал 4 кIушивруву. Турнирданий гьуртту хьун бувкIун бия хъинну лахъсса спортрал шачIанттайн лавхъсса спортсментал. Улу вайннавух ия 20-ла дунияллул чемпион хьусса МахIаммадов ТIагьиргу. Амма ванаяр ххув хьуну, цалчинмур кIану бувгьуна Дарбантуллал райондалийсса Белиджи шяраву ялапар хъанахъисса, кIийла ка дишавриву дунияллул чемпион хьусса, Ккуллал шяравасса Рабаданов МахIаммадлул.
Турнирданул ахирданий ка дишаврил жям хьуна укунсса: 70 кг. 1.Рабаданов МахIаммад. 2. Узикаев Аьбдул. 3. МахIаммадов ТIагьир; 80кг. 1. Атаев Кемран. 2. Исагайдаров Казбек. 3. Рабаданов Низами; 90 кг. 1. Халикьов МахIаммад-Вали. 2. ХIамзатов Бахтияр. 3. Аьлиев МахIаммадхаликь; 90 килояр лахъми. 1. Алискандаров. 2. Хизриев МахIаммад-Расул. 3. МахIаммадов Руслан.
Ххув хьуминнан дуллуна заварду, дипломру ва арцу дусса конвертру. Хасну Бархъаллал шяраваллил цIания, Лакрал ва Ккуллал районнал цачIусса полициялул хъунама МахIмудов Маратлул Аьлиев МахIаммадхаликьлун буллуна гъаргъ арцуясса зава, ххувшаву ласун яла хIарачат буллай ивкIма спортсмен хIисавну. Ванийну къуртал хьуна цалчин дурсса, Чупалав Оьмаровлул цIа абад дуллалисса, завардал армспортрал турнир.
