[dropcap]И[/dropcap]нсаннал оьрму бавхIуну бур тIабиаьтрацIун. Ванил щаллу дуллай дур инсаннан аьркинмур, чурххан дукия, дакIнин ххуйшивуртту.
Мунияту мюрщи оьрчIру тарбия бавриву хъунмасса кIану бугьлан бикIай лагмасса тIабиаьтращал гай кIул баврилгу. Му кIанттух хъуннасса ургъилшиву дуллай бур Ваччиял оьрчIал багърал мюрщултрал тарбиячиталгу.
ХIажимурад ХIусайнов
ОьрчIал багърал тарбиячитал лагай, гьарца кьини тIиссакссагу, уртту-тIутIал авадансса ЧIяйннаарив. Бунияла, ва арив дикIай зунттаву ххяххайсса чIяруми уртту-тIутIив.
Уттигъанну ттул янилун багьуна, ЧIяйннаарив сайрданийгу лавгун, зана хьуну нанисса Ваччиял оьрчIал багърал ца кIапIал. Вайннащал бия хъунмур тарбиячи Апанниева Магьият ва ванил кумагчи Рамазанова Салимат. Нагу, вай буний лагма лаган бувну, рирщуссия сурат хъамакъабитулун, «Илчилийхчин» цинявннахь яла майшангу учиншиврул.
