Июль зурул 1-мур кьини Новостройрайсса Чапаевкаллал жяматрангу, лагма-ялттусса шяраваллаву яхъанахъиминнангу хъуннасса ххаришиврул кьини хьунни. Му кьини цIуну тIивтIусса «Солнышко» тIисса оьрчIал багъравун кьамул дурссар цалчинсса оьрчIал кьюкьа.

Мяйжанссар, 140 оьрчIансса кIану бусса садик шиндайдихьулийва тIивтIуссия, хъуннасса шадлугъ дуссия Новостройрай му кьини. Республикалул БакIчи Рамазан АьбдуллатIиповлуя тIайла хьуну, бусравсса хъамал бувкIссия му шадлугърайн. Амма документру дузал баву цахъис лахъи ларгун, июль барз бучIаннин ялугьлан багьуна оьрчIангу, нитти-буттахъангу, садикрал коллективрангу. ЦIуссалакрал райондалул КIулшиву дулаврил управлениялул хъунама Руслан МахIаммадовлул бувсунни школалийн бачиннинсса кIулшивурттал гьану бизлазисса садикру цIусса миналий чара бакъа аьркинну бушиву, хIаллицIух оьрмугу нирхиравун багьантIишиву. Бувсунни 140 кIану бусса садикрайн 400 аьрза буллушиву, хьхьичI ирглий кьамул буллалишиву ЦIуссалакрал райондалий прописка дусса кулпатирттавасса оьрчIру. «Садик гьарца аьркинмунил дузалну буссар, хIаятраву оьрчIру тIуркIу тIунсса ххуйсса площадкартту буссар ттизаманнул журалийсса, щюллишиврувун дахьлаган дурну дуссар садикрал территория. КIанттул СПОК-лущал икьрал дуварду, гиккува Новостройрайсса шяраваллил хозяйствалул ххуй­сса продукция садикирттайн диян дуллан», — увкунни Руслан МахIаммадовлул. Садикрал хъунмур Оксана Исмяиловал бувсунни цалсса 80 оьрчI кьамул увшиву хъуними группардавун, август зуруй аьркинссаксса оьрчIру кьамул бувантIишиву. Мунил хъунмасса барчаллагь увкунни цIусса миналий ххуйсса садик тIитIинсса хIарачат бувсса райондалул хъунама ХIажи Айдиевлуйнгу, «Дирекция строящихся объектов Новострой» ГУП-рал директор МахIаммадсани Мяндиевлуйнгу.
Нитти-буттахъал цIанияту барчаллагь тIутIисса ихтилат бунни Сусанна Асбаровал: «Цимирагу шинни жу ва садик тIитIаврих ялугьлай, жугу ххарину буру ва садикрай оьрчIан ххуйсса кIулшивурттугу, цIакьсса тарбиягу дуллантIисса ххуйсса коллектив зий бушаврия, ххарину барчаллагь тIий буру цIусса миналий къулайсса оьрму дузал буван хIарачат буллалисса райондалул хъуниминнайнгу», — увкунни мунил. Барачатсса хьуннав мюрщултрал цIусса садикравун лавсъсса ша! Чапаевкаллал шяравумур садик барачат хьуну Новостройрайсса махъми шяраваллавугу гукунма ххуйсса садикру хьуннав!