Март зурул 14-нний ЦIуссалакрал райондалийн увкIунни ДР-лул цIуллу-сагъшиву дуруччаврил министр Танка Ибрагьимов. ЦIуссалакрал райондалийсса ЦIуссачIурттащиял жяматрал министрнал хьхьичI гьаз бунни шяраву участковый больница тIитIаврил масъала.
И. Саидова
ХьхьичIва совхозрал контора бивкIсса къатраву бивкIссар райондалул ххюра шяраваллил агьали кьамул буллалисса райондалул больница.
Танка Ибрагьимов, ванал хъиривчу Салман АхIмадов, ЦIуссалакрал райондалул администрациялул бакIчи ХIажи Айдиев, ДР-лул Халкьуннал Мажлисрал депутат Зайнуллагь Мирзоев, Гумбетовуллал райондалул бакIчи МахIаммадаьли МахIаммадаьлиев, ЦIуссалакрал райондалул депутатътурал мажлисрал председатель Мавлидин Исламаьлиев, ЦIуссалакрал райондалул больницалул хъунмур хIакин Людмила Султанова, ЦIуссачIурттащиял шяраваллил бакIчинал бигарду чIумуй щаллу буллалисса НурмахIаммад НурмахIаммадовлул ххал дунни кIизивулийсса вай къатрал тагьар.
Яла хъамал хьунабавкьунни шяраваллил жяматращал. ЧIурттащиял агьулданул тавакъю бунни министрнахь ва агьамсса масъала анавар буккан бан кабакьу бува куну. Танка Ибрагьимовлул махъ буллунни ва масъалалул хIакъираву Республикалул БакIчинайн баян буван.
Ялувсса ЦIуссачIурттащиял шяраву больница тIитIаву ца хъуннасса агьамшиву дусса социал масъала хъанай бур.
Хъирив министрнал ва ванащал архIалминнал ххал бунни ЦIуссалакрал райондалул азархана. Министр хьунаавкьунни райондалул больницалул зузалтращал ва ихтилат бунни цIуллу-сагъшиву дуруччаврил, агьалинан медициналун кумаг баврил хIакъираву.
Райондалул поликлиникалийн увкIсса чIумал ванал ихтилат бунни шиккусса къашайшалтращал, ххал дунни поликлиникалул оборудование. ЦIуссалакрал райондалул больницалул даврия министр рязийну ливчIунни
