Январь зурул 17-нний хьусса батIаврий Дагъусттаннал БакIчи Сергей Меликовлул тапшур бунни Дагъусттаннал хIукуматрал 1-ма хъиривчу Батир Эмеевлуйн, щин ялтту ларгун, зараллу бивну бивкIсса ЦIуссаккуллал шяраваллил агьалинащал хьунаавкьуну, миннал масъала анаварсса мутталий ххал бигьин.
Эмеевлущал бия цIуссаминалийн бизан баврил масъалартталсса буллалисса Дагъусттаннал Управлениялул хъунама ХIажи Султанов, ЦIуссалакрал райондалул бакIчи МахIаммад-ХIажи Айдиев, ДР-лул Халкьуннал Мажлисрал депутат Амирхан Амирханов ва райондалул идарарттал вакилтал.
Президентнал тапшур бувсса куццуй, делегациялул ххал диргьунни, махъсса ппурттуву хъунмасса хIаллай гъараллу лачIлачIаву сававну, щинахьхьун дагьну диркIсса ЦIуссаккуллал шяравалу. Шикку щинавун бахьлавгун бур кIичIиртту, къатта-къушнил хьхьичсса хIаятру, багъ-бахчарду.
Шяраваллил тагьар ххал диргьуну махъ, ХIажи Султановлул кIицI лавгунни цIуминалийн бизан бувсса аьрщарай инсантуран ккаккан дурсса инфраструктура щалла дузал дурну дакъашиву: дакъар шикку гъараллал щин экьи гьансса къанавртту.
– ЦIанасса ппурттуву сакин дурну дуссар ялттурасса щин дачинсса къанавртту дуклакисса давуртту. ХIасил, чIал къавхьуну дуллантIиссар дренаж система ва магистрал щинал ххуллу низамрайн бутлатисса давуртту, – кунни Султановлул.
Батир Эмеевлул бувсунни цIуминалийсса шяраваллаву салкьи хьусса цинявппа масъалартту, цачIун бувну, дузрайн буккан бантIишиву. Ванал мукунма кIицI лавгунни щинахьхьун дагьсса аьрщарал масъаларттугу анаварсса мутталий щаллу бантIишиву.
