Гъумучиял оьрчIал библиотекалуву хьунни террордания жяматрансса нигьачIаврин хас дурсса мероприятие. Муний гьуртту хьунни Гъумучиял школалул ва лицейрал 8-9-ми классирттал дуклаки оьрчIру, учительтал ва библиотекалул зузалт.
Му дачин дурну бия библиотекалул зузала Будайчиева Ххадижат. Цилва ихтилатраву ванил бувсуна ватан цирив, цумацагу инсаннан му циван ххирану дикIан аьркинссарив, миллатирттал дянивсса дусшиву цуксса агьамссарив, жунна ятсса ва жулва жяматран нигьачIисса экстремизмалул мархри ча-цукун нанисса буссарив.
Балугъравун къабивминнал иширтталсса буллалисса инспектор, полицанал хъунама лейтенант Амир Нураттиновлул цалва ихтилатраву кIицI лавгуна, цуксса хIайпнугу, цалва оьрму зия бансса ххуллу язи бугьлагьими махъсса шиннардий жагьилтурал дянив чIяву хъанай бушиву. Мунил хъунмур тахсиргу ванал ккаклай бур оьрчIал нитти-буттахъай, яла къулагъас аьркинсса оьрмулуву дагьайссаксса аякьа дуллай бакъашиврий чIурчIав дуллай. Бувсуна хъун хъанахъисса ник экстремизмалул къяцIухьхьун къабирияву мурадрай, миннал нитти-буттахъащал ва преподавательтуращал хасъсса профилактикалул давуртту дуллай бушиву чIумуя чIумуйн.
