[dropcap]З[/dropcap]унттавусса шяраваллаву яхъанахъисса инсантурал оьрму чан­сса бухьурчагу бигьа бансса хIарачат буллай дур хIукумат.

[dropcap]М[/dropcap]у иширал бакIрай бавцIусса идарану хъанай бур Ваччав тIивтIусса МФЦ. Ва идаралул кумаграйну сайки циняв инсантурал буруккин­тту щаллу буван бюхълай бур. Учиннуча, паспорт ласаву, прописка даву, оьрчIан пособия бишаву, къатта-къушлил чагъарду щаллу баву. ХIасил, щаллу дуллай дур чIярусса аьркинлугъру.

ХIажимурад ХIусайнов
Амма ца-ца идара зий бур лавгзаманнул хъалтлий. Ккуллал райондалий яхъанахъисса 600-нная ливчусса захIматрал ветерантал бур кук­лушиврун дулайсса 131 къуруш ласуншиврулгу, ччувччу­сса ттукIрах бурж бакъашиврул справка ласунгу Гъумукун хъирив хъанахъи буллай. Циванни щаллу­сса муниципал райондалий бикIан къабагьлагьи­сса Дагъусттаннал Энергосбытрал идара? ДукIу цаппара зурдардий буссия му Энергосбытрал идара Ваччав. Яла, «оптимизация» дуллалиссар тIий, лавкьунни.

Лажинни, къашайссарив ми кIива-шанма мурад кIава МФЦ-лийхчин бартбигьлан, кIанил программалийн ласун?! Ттул пикрилий, ва масъалалул хъирив бу­ккан багьлай бур райондалул хъуниминнан. БучIия райондалул чулуха­сса депутатнан гьаз бан ва масъала.
Биччибакъулшиву къадуллай, жухгу, зунттаву яхъанахъисса инсантурах, къулагъас дуллалияра!