Вай гьантрай ТIюхчардал 1-мур школалул актовый залдануву лахъа-хъунну хьунни юбилейрал медаллу дуллалисса шадлугърал мажлис. Медаллу дулун учIан увну ия ТIюхчардал шяравасса, тай дяъвилул шиннардий хъунмасса захIмат бивхьусса, ккаши-мякь ккавксса 12 ветеран.

Дяъвилул оьрчIшиву зерххусса, чIявусса ккавксса вай инсантуран тачIав хъамакъаританссар тай кьинирду, тачIав хъин къахьунссар дяъвилул дурсса щавурду.
Ветерантуран медаллу дулун школалийн бувкIун бия райондалий бусравсса инсантал: ЦIуссалакрал администрациялул хъунаманал хъиривчу Алик Исрапилов, райондалул администрациялул зузала СултIанат ЦIунтIаева, ТIюхчардал шяраваллил администратор Аьли Аьлиев. Медаллу ларсми ва щалагу щарнил жямат Ххувшаврил байрандалущал барча буллалисса ихтилат бунни школалул директор ЩайхахIмад Дадаевлул ва хъамаллурал. Тай шиннардий цанма ккавкцириннуя бувсунни Аьбдул Алхулаевлул, ТIажиб Алхулаевлул, Имамаьли ХIаммадовлул. Ва кьини дуклаки оьрчIалгу ветерантурал хьхьичI увкунни дяъвилул балайрду, ккаккан дунни къавтIавуртту. Ахирданий дуклаки оьрчIругу, ветеранталгу цачIу бавцIусса дакIний личIансса сурат рирщунни.
Оьрмулул бугьара хьуну, шиккун бучIан къавхьуми ветерантуран медаллу дулун шаппа-шаппайн лавгунни.