Февральданул 18-нний райондалул администрациялуву хьунни, цIусса миналийн куч хъанахъисса лакрал жяматрал батIаву. БатIавриву гьурттушиву дунни райондалийсса гьарца щархъавасса лакрал вакилтурал ва мукунма жагьилтурал чулухасса вакилтурал.
Миккура гьурттушиву дунни ДР-лул Халкьуннал Собраниялул депутат Мирзоев Зайнуллагьлул.
БатIаврий каялувшиву дуллай ия райондалул хъунама ХIажи Айдиев.

Ххалбигьлагьисса агьаммур масъала хъанай бия цIусса миналий ЦIуссалакрал райондалун цIа дизаву, мунин багьайсса статус булаву, ва му масъалалул лагма хIасул хъанахъисса гъалгъарду.
БатIаврил хьхьичIмукъуву ХIа­жи Айдиевлул аьщуйн щуну бувсуна ххалбигьлагьисса масъалалул агьамшиву ва му ци кьяйдалий ххалбигьлай бивкIссарив. Хъунаманал бувчIин бунни цува цаламур пикри хьхьичIунмурди, ялувмурди тIий акъашиву ва такIуйгу къаивкIшиву жяматийсса масъалардаву. ДакIнийн бувтуна, дукIу гъинттул респуб­ликалул ХIукуматрал жулла райондалийсса шанна шяраваллин хьхьичIрасса чачаннал цIарду дизансса пикри сукку бувкун, щархъал жяматирттал бувсса хIукмурдайн бувну, жяматращал архIал, личIи-личIину щархъан цIарду дизаврийн къаршину ивкIшиву ва ХIукуматрал хьхьичI жяматрал пикри кьянкьану бихьлай ивкIшиву. ЛичIи-личIину щархъан цIарду къадирзун, хIукуматрал хьхьичI цIусса миналий аьмну щалла райондалун цIа дизаврил масъала хIукуматрал хьхьичI гьаз бан хIукму хьуну бивкIсса. Му масъалагу мукунма щархъал жяматирттал батIавурттай ххалбивгьушиву. Ми батIавурттайсса аьмну райондалун цIусса миналий цIа дизаврил масъала сукку баврий рязисса протоколлугу вава залдануву вакилтурал був­ккушиву. Му жяматрал хIукму щаллу баву мурадрай, му хIукму республикалул хъуниминначIан баян бан, бувчIин бан, вакилталгу лавгун бивкIссар. Мува масъалалул хIакъираву правительствалувун жяматрал ва райондалул хъунаманал пикри бувчIин буллалисса справкагу тIайла дуркссар. Му справкалувугу ккаккан бувну буссия лакрал жямат цIусса миналийн бизан баврил шартIру ялу-ялун оькки хъанай, къума хъанай душиву.
Жяматрал тIалавшин душиву цIусса миналий цалунна райондалун цIа дизаву. Му масъалалул цIаний ларгсса шинал махъсса зурдардий правительствалущал хъуннасса даву дурссар.
Махъра-махъгу Дагъусттаннал ХIукуматрал вице-премьер Р. Жяъпаровлущал хIадур дур­ссар Республикалул хъунама Р. АьбдуллатIиповлучIансса цIусса миналий райондалун цIа дизаврил хIакъиравусса справка. Муний цалчинсса пунктну кка­ккан бувну буссия нанисса шинал кIилчинмур кварталданий цIусса миналий ЦIуссалакрал райондалун цIа дизансса нормативно-правовые актру республикалул Халкьуннал Собраниялувун тIайла дуккан. Миккува кIилчинсса пунктну бур мива документру нанисса шинал шамулчинмур кварталданий Халкьуннал Собраниялийн гьан бан Аух райондалун цIа дизаврил хIакъираву. Мунийн бувну, цалчин ххалбигьинтIиссар ЦIуссалакрал райондалун цIа дизаву, кIилчин Аух райондалун дизаву. Республикалул хъунаманал му справкалийсса пунктирттай рязишивугу дурну, къулбасгу дурссар. Ми пунктру иширайну щаллу бансса бигаргу бивхьунни.
ХIажи Айдиевлул увкунни:
— Ттул пикрилий, укунсса цIа дизаврил хIакъиравусса хIукуматрал хIукму, жува цIусса миналий, жула лакрал райондалий цIакь шаврил чулухунмай­сса хъунмасса шар, райондалун цIа дизайссар – къадизай­ссар тIисса кIихIулласса пикрирду чулух буллалавур.
Райондалул хъунаманал бувсуна, райондалун цIагу дирзун, цIусса райондалун статусгу дулаву – му ца-кIива зурул дянив шайсса зад бакъашиву. Му масъала щаллу хьуннин бю­хъайссар шаннахъул шин гьан. Мунияту райондалул цIанилгу, статусралгу хIакъираву цIанава къайгъу буллалаву жунма аьркинсса, мюнпатсса иш хъана­хъиссар. Му бакъассагу, цIусса миналий аьркинсса идарартту баврингу дайшишру хъанай дур, тийх цIа дизаврил масъала щаллу буллай байкъабивхьуссаксса. Амма, ялагу ва масъалалул лагма аьркин ба­къасса, рязий­ссияв – къарязийссияв тIисса хаварду къабикIаншиврул, ттун ччай бур нава гьарца шяраву, шиккугу, Новостройрайгу, жяматращал хьунаавкьуну, миннал дакIниймур балжину кIул бан. Му хьунаакьавугу, бувну графикгу, март зуруй хьунтIиссар, — куну.
Шиккува ХIажи Айдие­влул бувсуна Аьрасатнал ХIуку­матрал буккан бувшиву личIисса, Дагъусттаннан хасъсса постановление. Мунивугу хасъсса пунктну бушиву 2018 шинайннин ЦIуссалаккуйсса лак цIусса миналийн бизан баврил программа щаллу дан ва цIусса миналийн бизаврил масъалартту щаллу бан ми шиннардил дянив харж бан 7-нния ливчусса миллиард арцул. Мукунма бувсуна цIусса миналийн бизлазисса жагьилсса кулпатирттан къатри баврил масъала федерал бюджетрайну щаллу бансса шартIру ххалдигьин, цува федерал министрнащал хьунаавкьусса ва микку масъала къулайну щаллу хъанай бушиву.
Бан ливчIсса зад бур – му хIакъираву Республикалул ХIу­куматрал дайсса дахханашивуртту дурсса постановление буккан баву. Му буккайхтува, ХIукуматрал комиссиялий цIакь дантIиссар жагьилсса кулпатирттал сияхIру. ХIажи Айдиевлул бувсуна цIусса миналийн бизлазиминнан булайсса компенсациялиягу. Му кIану ххалбивгьуну къуртал хьун аьркинссар правительствалуву мартрал ахирданий.
Райондалул администрациялуву хьусса батIаврий Гьамиящатусса Рамазанов Аздардул дуруна жулла райондалийсса лакрайнсса оьвчаву. Мунал кIицI бувна, лакран хъана­хъисса дайшишрурдал, хьхьичIун дагьлагьисса захIматшивурттал сававртту жува, махъ ца бувну, циняв ца ххуллийх къабачавриву душиву. ЦIанамигу, гихунмай хьунабакьлантIими масъалар­ттугу лакран мюнпатну, хайрну щаллу булланну тIий бухьурча, жува аьркинссару чIивимагу, хъунамагу ца хьуну ца ххуллийх бачин!
Сулайман Чугуев