Цала уттининсса оьрму нахIуну, хIалалну, куннан кув бувчIлай, пашманшиву ва ххаришивугу архIал кIидачIлай октябрьданул 6-нний 70 шин бартлаглай дур Керимов Жаруллагьлул ва ванал оьрмулул дус Розал.

Керимов Жаруллагь увну ур 1926 шинал апрельданий мусил усттар КьурбанмахIаммадлул ва ПатIиматлул кулпатраву. Ванал хъунмур оьрму лавгун бур Бухарнаву. Совет хIукумат лирну махъ МахIачкъалалив зана хьуну, шикку ялапар хъанай бур. Жаруллагь буттал пишалийх лавгун акъар, ваная хьуну ур ветеринар, цувагу ларайсса кIулшиврущалсса. Жаруллагь зий ивкIун ур УзбакIнаву, Бухарнал областьрал «Зооветснабрал» хъунаману. Ва даврий зуннин ванал буккан бувну бур дарув ца-ца чIи бувайсса ттардал 2-3 чIи буллали бувайсса, цивппагу Бухар ссуникIру бусса. Жаруллагь, ветврач акъассагу, цайми элмурдавугу хъинну итххявхсса, хьхьичIуннайсса кIулшивуртту дусса инсан ур. Ванал гьунар бур чичаврил, архитекторшиврул, кьяпри бувайсса усттаршиврул. Учин мукъун, гьарцагу чулуха итххявхсса ур.
Ванал кулпат Маммаева Розагу, ГьунчIукьатIрал учительтал дяъвилийн лавгсса чIумал, педучилищагу къуртал бувну, байбихьулул классирттахь дарсру дихьлай бия. Роза бувну бур 1927 шинал Маммаев Мяммал ва ПатIиматлул кулпатраву.
Жаруллагьлул ва Розал дянив хьуну бур 4 оьрчI – 2 арс ва 2 душ. Вай хъунигу бувну, чивун бу­ккан бувну бур. Вайннал хъунама арс КьурбанмахIаммад Аьрасатнал Федерациялул цIанихсса архитектор ур. Хъиривма арс ХIажи инженер ур. Асият сурат дихьу бур, чIивимур душ Занни Педуниверситетраву чил хIукуматирттал мазурдил дарс дихьлай бур. Жаруллагь ва Розагу цала оьрчIал оьрчIру хъуни буллай, миннал лагма-ялтту буклай бур.
Жаруллагь ва Роза лайкь хьуну бур цаппара медаллан, вай бур захIматрал ветерантал, мукунма дяъвилул ветеранталгу. Оьрмулух къаурувгун, даву къадуллай ацIан къашай­сса инсан ур Жаруллагь. Ва ­уссия ГьунчIукьатIрал общиналул (ккурандалул) председательнугу. Мадара захIмат бивхьуссар буттал шяраваллил лажингу, аьдат­ругу дуруччин.
Зул цачIусса 70 шинал юбилей барча дуллай бур зул оьрчIру, оьрчIал оьрчIру, гъан-маччами ва дустал. ЧIа тIий бур зун цIуллушиву. Вайннал ххари буллай, оьрмулул буччиннин битаннав зу!
ГьунчIукьатIрал ккурангу барча дуллай буру зул цачIусса оьрмулул 70 шинал байран. Зу­хьхьун цIуллушиву дулуннав.
ГьунчIукьатIрал ккурандалул чулуха Амин Аьбдуллаев