Гъумучиял школалул гьашинусса выпуск цурдагу дия мяйцIалчинсса выпуск. Школа къуртал буллалими барча бан бувкIун бия райондалул бакIчиЮсуп МахIаммадов, ванал хъиривчу Абакар Къюннуев, депутатътурал мажлисрал хъунама Шяпи Щурпаев, КIулшиву дулаврил управлениялул каялувчи Явсупи ХIамзаев.
[dropcap]Ш[/dropcap]кола къуртал буллалиминнахь ххуллухъин тIий, Юсуп МахIаммадовлул увкунни:
— Ххирасса оьрчIрув, хIакьину зу буклай буру зула оьрмулул агьамсса шанбачIулийн. ХIакьину зул хьхьичI тIитIлатIиссар чIявусса ххуллурду. Цуманал цумур ххуллу язи бугьантIиссарив зу ччянива пикри бувхьунссар. Бартлаганнав зул хияллу ва ниятру. [pullquote]Гьашину Лакрал райондалий 11 класс къуртал буллай ур 37 инсаннал, 75 оьрчIал бувккунни 9 класс.[/pullquote] Вания тихунмай зу зувару зула бучIантIимунил ялув хIукмурду буллантIисса. Амма, кьадарданул зува чунмай буцирчагу, хъама мабитари зула мархри, зула оьрчIшиву ларгсса буттал улча, кIулну бикIияра район зухра ялугьлай душиву, — увкунни райондалул бакIчинал.
Ва базилух Гъумучиял школалий ацIния цава класс къуртал буллай ур 23 оьрчI.
Дуккавриву, спортраву хьхьичIун ливчуминнан школалул директор Ххадижат ХIусниевал дуллунни хIурматрал грамотарду.
Цалчинмур классрал дуклаки оьрчIалгу барча бунни школа къуртал буллалими шеърирдайну, балайрдайну. Аьдатрайн бувну, вайннал ка дургьунуяхха мюрщулт школалийн бувкIссагу. Вана утти хъамакъабитулунсса бахшишругу дуллай.
ДайлиртIуна байран махъра-махъсса занг рищаврийну ва ссавнийн шарду итабакьаврийну.
Зулайхат Тахакьаевал
