Мартрал ахирданий Республикалул Нураттин Юсуповлул цIанийсса ОьрчIал библиотекалуву хьунни лакку мазран, лакку мазрайсса луттирду итабакьаврин хас дурсса батIаву. Муний гьуртту хьунни хъаннил «Дараччи» клубрал президент Мариян Илиясова ва жагьилсса художник, иллюстратор Ажу Къячаев.

Мариян ЧIибиевнал Оьр­чIал библиотекалун цалла давриву ишла буллан пишкаш бунни махъппурттуву бувксса, Ажу Къячаевлул суратирттайну чIюлу бувсса, лакку мазрайсса луттирду. Ми, кIулсса куццуй, бивщуну бур Москавлий, «Дараччи» клубрал харжлугърацIух.
Муния махъгу, апрельданул 4-нний, ва библиотекалувун мукунма хъинсса ссайгъатирттащал бувкIунни Мариян Илиясова. Ва ххуллух бия «Лакрал магьри» М-Х. Пашаевлул ва вай гьант­рай цIуну бивщуну бувксса Халил Халиловлул «Лахьхьи вила ниттил маз» луттирду. Ххуйсса чагъарданий, яргсса мужаллатрай бивщусса магьрал луттирду, гьарца дарсирай ишла бавриву хъинну хIалусса «Ла­хьхьи вила ниттил маз» лугу хьунни библиотекалий зузиминнангу, шивун заназисса оьрчIангу ххуйсса бахшишну. Вай луттирду библиотекалул миллатрал отделданул дуллалисса давур­ттавух хьхьичIунну гьуртту хъанахъисса оьрчIан бахшишран буллантIиссар.
Республикалул ОьрчIал биб­­лиотекалул зузалт барчаллагьрай бур «Дараччи» клуб­райн, мудангу цала чIарав бацI­лацIаврихлу.