Мартрал цалчинсса кьинирдай Ккуллал райондалийн гъилишиву дагьну, ганиннинма бувсса марххала зунттал хъачIунттая чан хъанай най буссия. Улу, кьиблалул чулинмай бивхьусса ххуллурдал яхъай янилун дагьлан диркIуна, дараччи тIутIаяр ялтту дурксса, къуппантIутIив. Дурусну вай кьинирдай хьунадакьару жула ниттихъал, ссурваврал, душварал кьинилун хас дурсса 8-мур мартрал байран.

ХIажимурад ХIусайнов
ХIатта ца кьини Хъаннил кьинину хIисав дувайхьурчагу, арамтурал дакIурдиву хъамитайпалул сурат мудангу архIал найнна дуссар. Ккуллал райондалул тIабиаьтрангу пикри хьухьунссия ци-дунугу дахханасса зат хъаннин пишкаш дуван. Лухччиний чантIа тIисса тIутIив цинявннан ххал къахъанахъисса чIун духьувкун, дурусну мартрал 7-нний, байрандалул хьхьичI кьини, лагмасса тIабиаьт кIялава-кIяласса, яру ласун буллалисса, марххалттанул лаххиярттал чIюлу дурна. Гай «лаххиярттал» ганзшиву дурусну 40 см. (на линейкалух бувцуссия цIивсса марххала) дия. Март­рал 8-мур кьини тIурча хьуна някIсса ссавний чувчIав ттуруллул ща бакъасса.
ХьхьичIсса кьинирдай райондалийсса циняв шяраваллаву хьуна байрандалун хас дур­сса тяхъашивуртту. Ттунгу бахтти хьуна мартрал 4-нний Ваччиял шяраву хьусса кIира тяхъашиврух ябитан. Ахттайн бизулуву Ваччиял шяраваллил Аьрасатнал халкьуннал аслийсса культуралул центрданий хьунни, ссуп­рагу къур бувсса, Ваччиял шяравасса хъами барча буллалисса байран. Му сакин дурну дия Ва­ччиял шяраваллил администрациялул, шяраваллил культуралул зузалтрал ва райондалул библиотекарттал зузалтрал цачIуну. Тяхъашиву дачин дурну бия Ккуллал райондалул библиотекарттал хъунмур ХIажиаьлиева ПатIимат. Ккуллал райондалул администрациялул чулуха хъами барча бувна вивсса политикалул отделданул бакIчи Хизриев Шамххаллул. Ванал бувсуна 1910-ку шинал Клара Цеткин тIисса хъамитайпалул, дунияллий яхъанахъисса хъаннил багьу-бизу ссуссукьу буллалишиву хIисавравун лавсун, гай, арамтал кунма, тархъанну яхъанан аьркиншивриясса масъала гьаз бувну бивкIшиву. Яла 1913-ку шиная шиннай дунияллийсса циняв хъаннил кьинину хьушиву 8-мур мартрал кьини.
Мажлисрайн бавтIми барча бувна Ваччиял шяраваллил бакIчинал хъиривмур Мадаева Розал. Балайрду увкуна Къяннал шяраваллил библиотекалул хъунмур Сяидова Аьйшатлул, ЦIуйшиял шяраваллил библиотекалул хъунмур ХIусайнова Басиратлул, Ваччавсса райондалул аьмсса библиотекалул зузала Аьлиева Шавлухълул, дяъвилул ветераннал щащар Муслимова Нурижатлул, Ваччиял шяраваллил Культуралул къатлул худрук Суллуев Муслимлул ва цайминналгу.
Мажлисрайн бавтIми барча бувна мукунма Ваччиял шяраваллил культурал къатлул хъунмур Оьмариева Аьишатлул.
Ахттая махъ гара кьини Культуралул центрданул залдануву ккаккан дурна Ккуллал райондалул культуралул зузалтрал концерт. Му дачин дурну бия Хъювхъиял шяраваллил культуралул къатлул хъунмур Оьмаева Рукьижат. Балайрду увкуна Ванатиев Гришал, СалихIова Шавлухълул, Кьурбанов ХIабибуллагьлул, Даллаева Зулфиял, ХIажиева РайхIанатлул, Кьурбанов Аьли­баглул, Ванатиева Маринал, ЦIаххаев МахIрамлул, Рамазанова Гулжагьрал, Даллаева Юлианал, Гудов МахIадлул, Мусаева РайхIанатлул, Исмяилова ПатIиматлул, АхIмадова Суджанал, Каптарова ПатIиматлул. КъавтIавуртту ккаккан дурна ЧIяйннал ва Ккуллал 2-мур школалул дуклаки душварал.