Гьарицагу инсаннал оьрмулуву дурагу цал кIицI лагайсса, ххарисса ва пашмансса асардацIун дархIусса байран дур школа къуртал буллалиминнан Махъва-махъсса гюнгутIи бишлашисса байран.
Му байран цинявппагу школардай лагай яргну, оьрмулухун дакIний личIанну.
ЦIуминалийсса ТIюхчардал школалий гьашину цалчин хьунни Махъва-махъсса гюнгутIул байран. Мунияту дуссияв, ляличIинура дакIний личIанссагу хьунни. ЦIуминалий школа тIивтIуну хъунма хIал къавхьунугу, гацIана нирхиравун багьну зий байбивхьусса ва школалий чIирисса чIумул дянив цимирагу ххаллилсса мероприятияртту хьунни, ми цинявгу итххявхсса оьрчIалгу, гьунар бусса учительтуралгу, каялувчинал опыт бусса директорналгу хIарачатрайну бюхттулсса даражалий ларгунни.

ХIакьинусса кьини оьрчIан куртIсса кIулшивуртту ва тIайласса тарбия дуллай ва школалий зий ур 25 учитель. Миннаву ур 2 учитель Аьрасатнал кIулшивуртту дулаврил лайкь хьусса зузалал цIа ларсъсса, 1 учитель ур Президентнал грант ларсъсса, бур ХIурматрал грамотарттан ва личIи-личIисса бахшиширттан лайкь хьусса.
Школалий каялувшиву дуллай ур АьФ-лул аьмсса кIулшивуртту дулаврил хIурматлувсса зузала, республикалул профсоюзирттал премиялул лауреат, райондалул Мажлисрал депутат Дадаев ШайхахIмад Рамазанович. ШайхахIмад Рамазановичлул 30 шин хьуну дур школалий зий, миннува 9 шин школалул директорну. Гьарица затраву низам ххирасса, жаваблувсса ЩайхахIмад Рамазановичлул коллективгу цува кунмасса, давриву дакI дирхьусса бур.
Гьашину ТIюхчардал школалул итабакьлай бур 11 класс бувккусса 7 ва 9 класс бувккусса 15 оьрчI. Махъва-махъсса гюнгутIул байрандалийн миннахь ххуллухъин учин бувкIун бия шяраваллил жямат, оьрчIал нину-ппу. Бия бусравсса хъамалгу: ЦIуссалакрал райондалул КIулшивуртту дулаврил управлениялул хъунама Руслан МахIаммадов, шяраваллил администрациялул хъунама Аьли Аьлиев, шяраваллил аксакал Аьбдул Алхулаев, чIярусса шиннардий ва школалий зий бивкIсса захIматрал ветерантал Идрис Идрисов ва ПатIимат Оьмарова.
Школа къуртал бувну, цIу­сса оьрмулувун бухлахисса дук­лаки оьрчIан тIайлабацIу, хьхьич­Iуннайшивуртту чIа тIисса дакI­нийхтунусса ихтилатру бунни байрандалийн бувкIминнал.
— Школа къуртал бувну махъсса зул оьрмулуву чIявусса затру хъар хьунтIиссар хIакьину лавсъсса шаттирая, язи бувгьусса ххуллия. Му ххуллугу тIайласса, дахшишру да­къасса лякъиннав. Зула дакIнийсса мурадирттайн бияннав. Циняв хияллу бартлаганнав. Школалулгу, шяраваллилгу цIа бюхттул дансса инсантал хьуннав зуяту, — тIий дуаьртту дунни ихтилатру буллалиминнал.
ОьрчIал ккаккан бунни школалухь барчаллагь тIисса, литературалул ва музыкалул композиция, увкунни балайрду, ккаккан дунни къавтIавуртту. Школа къуртал буллалими бивзунни аьдатравун дагьсса школданул вальсрай. Школа къуртал буллалиминнал ва байбихьулул классирттал дуклаки оьрчIал куннал куннан дакIний личIансса бахшишру дунни. Цалла кIулшивурттал гьану бивзсса школалухь ва цахьра дарс дирхьусса учительтурахь дакIнийхтунусса барчаллагь увкунни школа къуртал буллалисса оьрчIалгу. Цинявннан асар хьунни, выпускниктурахь ххуллухъин тIий, миннан тIайлабацIу чIа тIий, 1-мур классрал дуклаки душ Руслана МахIаммадовал увкусса балай ва мюрщиминнал вальс.
ГюнгутIул байрандалий личIи-личIисса бахшишру дунни райондалул олимпиадарттай, спорт­рал ва цаймигу бяст-ччаллаву хьхьичIунсса кIанттурду бувгьусса дуклаки оьрчIан. Арцуйнусса бахшишру дунни ХIабибат Самадован ва Альбина Кьурбанован.
Школа къуртал буллалиминнан Махъва-махъсса гюнгутIи бищун вихшала дунни 11-мур классраву дуклакисса АхIмадхан Аьлиевлуйн ва 1-мур классраву дуклакисса Гулли Мусаевайн. Ми гюнгутIи бишлай лагма бувккун махъ, дуклаки оьрчIал ва учительтурал дакIний личIансса суратру рирщунни.
А. Аьбдуллаева
И. Саидова