[dropcap]М[/dropcap]ай зурул 4-нний ЦIуссалакрал райондалул хъунмур азарханалийн бувкIунни ДР-лул цIуллу-сагъшиву дуруччаврил министр Жамалуттин ХIажиибрагьимов ва мунал хъиривчуСалман АхIмадов. Вайннал аьрххилул мурад бия байрандалул гьант­рай хIакинтал цукун зий бурив ххал баву.

Жамалуттин Ибрагьимовлул ххал дунни терапиялул, хирургиялул, неврологиялул, гинекологиялул отделенияртту. ЛичIинура ххал диргьунни реанимациялул, приемный покойрал, анавар кумаграл хIакинтурал даву. Министрнал хъин хъанахъи­сса къашайшалтрахь цIувххунни дарурттал ва медициналул кумаграл хIакъиравусса масъаларттая.
ЦIуссалакрал райондалул азархана бур 137 инсан уттуишин увансса ва 20 инсан дяхтта кьамул увансса кIану бусса.

ХIакьинусса кьини азарханалий, райондалул жямат бакъассагу, хъин буллай буссар чIаххуврайсса Хасавюртуллал ва цаймигу районнал агьалигу. ЦIуссалакрал райондалул азарханалул даву ххал дигьлай, министрнал кIицI лавгунни медициналул документру дузал баврил давривусса цаппара диялдакъашивуртту. Вай документругу бувчIин бунни тIайлану щаллу бансса куц ва тIалав бу­нни анаварсса мутталий низамрайн буцаву.