Уттигъанну «Почетный гражданин Махачкалы» тIисса цIа дуллунни Дагъусттаннал Музыкантътурал союзрал председатель, Аьрасатнал искусствалул лайкь хьусса ишккакку, профессор Хан Башировлун.

Бадрижамал Аьлиева
Му цIа шадлугърал тагьарданий дуллунни Оьруснал театрдануву февральданул 5-нний хьусса ватандалухасса балайрдал «Дети Победы» фестивальданий. Хан Башировлун му награда дуллунни МахIачкъалаллал администрациялул Культуралул управлениялул начальник Фарид Абалаевлул. Мунал чIурчIав дунни ва цIа дулайшиврий шагьрулул цIаний хьхьичIунсса ккаккияртту чIалачIи дурсса инсантуран ва му дулунсса хIукмугу кьамул байшиврий шагьрулул депутатътурал мажлисрал.
— ХIакьину Хан Баширов хъанай ур Дагъусттаннал яла хьхьичIунми, цIадуркми музыкантътуравасса ца. Ва гьуртту шай шагьрулий дуллалисса сайки гьарцагу шадлугъравух. ЧIярусса шиннардий каялувшиву дуллай ур Дагъусттаннал Музыкантътурал союзрай, шагьрулул культура хьхьичIуннай данмур буллай. Ларайсса пишакаршиврухлу, дакIнийхтунусса чIярусса шиннардил лахъишиврийсса захIматрахлу, шагьрулул культура хьхьичIуннай давриву буллалисса хъунмасса хIарачатрахлу, шагьрулул депутатътурал мажлисрал сессиялий бувссар ва хIукму – Хан Башировлун «Почетный гражданин Махачкалы» цIа дулун, — увкунни Фарид Велихановичлул.
Хан Башировлул мархри бур Гъумучатусса. Увссар Мирзаханнул арс Хан Баширов 1954 шинал январьданул 1-нний. 1978 шинал марцIсса ххювардай къуртал бувну бур Астраханнал паччахIлугърал консерватория (специальность «Фортепиано»), 1988 шинал мукунма хьхьичIунну къуртал бувну бур ДГУ-лул тарихрал факультет.
Хан гьуртту хьуну ур цикссагу фестиваллавух ва конкурсирдавух, билаятрал ва дунияллул халкьуннал даражалийсса. ЧIярусса шиннардил лахъишиврий дуллай ур музыкалул жяматийсса даву, цимирагу конкурсрал, смотрдал жюрилуву. Ва ур Творчествалул жагьилтурал советрал председатель, ДР-лул МВД-лучIасса, УФМС-лучIасса жяматийсса советирттал член. Агьали, махъа нанисса жагьилтал эстетикалул зумуну тарбия бавриву дурсса хъуннасса творчествалул даврихлу лайкь хьуну ур чIярусса бахшиширттан, хIурматрал грамотар­ттан, дипломирттан, медаллан. Хан Башировлулли М. Къажлаевлул, М. ХIусайновлул, М. Кьасумовлул, Н. Дагьировлул, В. Шауловлул, Кь. МахIаммадовлул ва цаймигу дагъусттаннал композитортурал чивчусса произведенияртту цалчин щаллу бувсса.
Ванал концертру ккаккан дур­сса шагьрурдал дазу-зума хъинну гьартасса дур.
Гьунар бусса инсаннавусса гьунарду цагу-кIивагу къабикIай. Хан Башировлул чивчуну бур музыкалул темардайнсса цаппарасса яргсса хавардугу: «Музыка», «Волшебные пальцы», «Мечта», «Рояль», «После разлуки», «Музыкальный экспромт» ва цаймигу.
Итталун дагьансса давурттив дурну дур ванал кинематографиялувугу. Ванал дургьуну дур роллу «Похождение графа Невзорова», «Тайна рукописного Корана», «Сказание о храбром Хочбаре», «Шамиль», «Платон» художествалул кинордаву. Миннувасса ца­ппараннухлу лайкь хьуну ур ДР-лул ПаччахIлугърал премиялун. Мукуна Хан Баширов гьуртту хьуну ур «Мир Кавказу», «Мы верим», «Мурад Кажлаев. Снова в горы», «Моя дорога. Расул Гамзатов», «Мурад Кажлаев. Музыка жизни» документал кинордавухгу.
УзбакIнал цIадурксса композитор Баходыр Исматовлул хас бувну бур Хан Башировлун цалва произведениярттавасса ца. Мунан хасну назмурду чирчуну дур Аьрасатнал шаэртурал Н. Парфеновлул, В. Даниловлул, Р. ХIамзатовлул, М. Давыдовлул. Расул ХIамзатовлул мунайн учайсса бивкIссар «Хан музыки, Башир любви» куну.
Мунал сурат дирхьуну дур художниктурал А. Ходжаевлул ва ХI. Сунгъуровлул, скульптор Ш. Бюрниевлул ва бартбисурду щащу А. МахIаммадовал.
Музыкалуву ва жяматийсса давриву бихьлахьимур захIмат бакъасса, 40-нния лирчусса шинну хъанай дур ванал педагогикалуву зий, республикалул оьрчIру ва жагьилтал музыкалухух, искусствалухух гьан буллай. Ванал дарс дирхьусса оьрчIава чIявуми лайкь хьуну бур ларайсса цIардан, къачансса дуклай бур билаятрал личIи-личIисса шагьрурдайсса консерваториярттаву.