Июньдалул 5-11-нний МахIачкъалалив ва Дарбантлив хьунни ирглийсса 6-сса фольклорданул ва аслийсса культуралул халкьуннал дянивсса «Горцы» фестиваль. Фестивальданул чIаравбацIултну хьунни Дагъусттан Республикалул БакIчи, АьФ-лул Культуралул министерство, ДР-лул культуралул министерство ва АьФ-лул Халкьуннал творчествалул Къатта, мукунма Дагъусттанналссагу. Ва фестивальданий гьуртту хьуссар Аьрасатнал субъектирдал ва чил хIукуматирттал вакилтал.
Гьуртту хьунни ва фестивальданул давурттавух Ккуллал райондалиясса коллективрдугу. Июньдалул 7-нний гала-концертрай гьуртту хьунни «Бартукь» ансамбль ва Вихьуллал шяравусса искусствалул школалул оьрчIал ансамбль. Дарбантлив хьуми шадлугъирттавух гьуртту хьунни Хъусращиял шяравасса Ванатиев Гриша. МахIачкъалалив хьусса «Поэзия народного костюма» фестивальданувухгу гьуртту хьунни ансамбль «Бартукь». Циняв кIицI бувми бувкIунни дипломру ва бахшишру ларсун.
Камилат ХIажиева
