Ва зурул 20-22-нний Гъумук хьунни «Учитель года Дагестана – 2015» конкурсрал муниципал этап. Муний гьуртту хьунни райондалул 8 школа: Гъумучиял, КIундиннал, Кьубиял, Ххюлуссуннал, Ккурккуллал, ГьунчIукьатIрал, Карашрал ва Гъумучиял лицей.

Конкурс хьунни 2 турданий. Цинявппа учительтурал дарсру дирхьунни Гъумучиял школалий ва лицейраву. Цалчинмур тур – педагогическая мастерская. Учительтурал жюрилухь бувсунни ттизаманнул технологияртту ишла даврил опытрая. КIилчинмур турданий учительнан багьлай бия дарсирай ккаккан дан дарсирдал дянивсса дахIаву ФГОС-рал цIусса тIалавшиннардацIун даркьуну дарсирал анализ дан бюхъаву.
Жюрилул кьимат бищавриву хIисав дуллай бия: цалла дарс ттизаманнул даражалий кIулну душиву; дарсирал тема аьч даврил ляличIишиву; дарсираву дунияллий хъанахъимур ккаккан баву; дуклаки оьрчIал цалла кIулшивуртту дарсирай ишла даву сакин дан бюхъаву; дуклаки оьрчIал куннащал куннал дахIаву сакин даву; дарсирай ишла буллалисса сурсатру (видео-аудиоматериаллу, наглядныйсса пособияртту, мультимедийный­сса презентацияртту) биялсса ва агьамсса бушиву; кIулшиву дулаврил технологияртту ишла даву ва цаймигу кьяйдарду.
Жюрилул бивщусса кьиматир­ттал хIасиллайн бувну, цалчинмур кIану бувгьунни Гъумучиял лицейрал биологиялул учитель Асият ХIасановал; кIилчинмур кIану – КIундиннал школалул оьрус мазрал ва литературалул учительница Абризат ХIажиевал; шамилчинмур – ГьунчIукьатIрал школалул оьрус мазрал ва литературалул учительница Зарема Мазаевал ва Гъумучиял школалул ингилис мазрал учительница Фаина Хизиевал.
Жюрилул ххуйчулий кIицI ларгунни Кьубиял школалул жагьилсса учительница Аида Гъазалиевал конкурсрайнсса бунияласса хIадуршинна.