Инт дайдишавривун Лакрал районнал щархъаву байбивхьунни хъарас щаврил байранну дуллай. Ларгсса нюжмар кьини байран хьунни Гъумук. Гьашину хъарас щунсса кьуру бия райондалул бакIчи Юсуп МахIаммадовлуй.
Зулайхат Тахакьаева
Никирая никирайн ирсирай нанисса, буттал буттахъачIа яла кьимат бюхттулсса, кьянатсса зунттал аьрщарал буллугъшиврул ва барачатрал лишанну хьуссаХъарас щаврил аьдат дунуккар хIакьинусса кьининин дурагу яхьусса хьхьичIазаманнул аьдат. Бусравну дур му шагьрурдай минарду думинначIагу. Шинаву кIира кьини дур хIатта бувагу кIива-шанма къатта ливчIмигума щарду уттара дуккайсса, шярава лавгминнан буттал кIану хъама къабитансса яхIлил ттарцIну хьусса – ца Зумаритавал байран, цагу – Хъарас щаврил кьини. Хъарас щаврил байрандалул ялагу жулла дакIурдиву хIасул буллай бур, жулла никирай ялавай багьну бухьурчагу, хъу-лухччинул кьадру жуява бивзминначIа лахъ хьунссар тIисса. ХIатта вай махъсса кIира шинал, западрал билаятирттал санкциярду баян бувния мукьах, ялун личлай бур хъу-лухччинуха зун ччисса инсантал. Вана ларгсса шинал «Ардаралу» КФХ-лул хъунама Самандар Абакаровлул Гъумучиял Оьллаарив ацIрахъул гектарданий нувщи бувгьуну ххуйсса бакIлахъия ларсунни. Шяраву захIматрал кьадру бусса кулпатраву оьрчIшиву ларгсса, муния махъгу шяраваллил хозяйствалул аралуву зий ивкIсса Юсуп МахIаммадовгу кабакьу буллай ур хъу-лухччинуха, ризкьилуха зун ччиминнан. ДакIнийн бутанна, ларгсса шинал Юсуп МахIаммадовлун дуллуссар «За любовь к родной земле» тIисса ХIурматрал лишан.
Гъумук хъарас щаврил байрандалул мажлисрайн бувкIун бия: Зунттал территориал округрайсса Лакрал райондалул куратор Аздар СалихIов; мудангу Лакрал райондалул бакIчинал чIарав бусса Ссапар Аьбдуллаев, ДР-лул Жяматийсса Палаталул хъунаманал хъиривчу; Рапи Абакаров, «Россельхозбанкрал» Дагъусттанналмур филиалданул хъунаманал маслихIатчи; Аьбдулхаликь Халикьов; ХIасан-ХIусайн Камалов, МахIачкъала шагьрулул Кировский райондалул администрациялул хьхьичIунсса пишакар; Сайпуллагь Аьбдуразакьов, МахIачкъалаллал ччатI шашай заводрал директор; Ккуллал райондалул администрациялул бакIчи Сяид Сулайманов; ЦIуссалакрал райондалул администрациялул бакIчи ХIажи Айдиев ва чIявусса цаймигу.
Цинявппагу хъамал бувккун бия Гъумучиял колхозрал багъравун. Гикку хъарас щаврил эбадатран хъун бакъасса хъунил парча гъай увкуна Юсуп МахIаммадовлул. Ванал гъай увкусса дазурдавух гьаннагу бишлай, дуаьртту ккалай най ия 45 шинал лажиндарай Гъумучиял колхозраву зий, райондалул шяраваллил хозяйство хьхьичIуннай давриву хъунмасса захIматрал бутIа бивхьусса бусравсса ризкьичи МахIаммадрахIин Абакаров.
Уртту-тIутIи дюхъаннав,
Гъар-гъарагъи дакьиннав,
Ттархь дургьунал
тта бюхъаннав,
КIамайму бувгьунал
хъу дюхъаннав!
Юсуп уксса сун хьуннав!
Хъунасса Заннал
цIими бишиннав!
Муния мукьах хьуна спортрал бяст-ччаллу: лечаврил, ка дишаврил, хьхьа кIункIу баврил, дучри ххяххан баврил.
Дучри ххяххан буллалисса мукьагу бурттигьунал лаххан хъудугьул кулпатрал чулуха пишкаш бувна хасну Москавлив бан бувсса чиллу-чухълул журалийсса футболкарду. Ва бяст-ччалливу хьхьичIун бувккуна Карашрал балчан. Чал заллу – МахIаммадов МахIаммад Залимханнул арс, хьхьичIун увксса бурттигьу – МахIаммадов КьурбанмахIаммад Ибрагьимлул арс.
Дучри ххяххан бавривугу, спортрал бяст-ччаллавугу ххув хьуминнан дуллуна арцуйнусса бахшишру ва дипломру.
Муния махъ РАЙПО-рал столовыйлуву тIивтIуна хъарас щаврил ссупра. Мунил тямадашиву дуллай ия Сапар Аьбдуллаев. Лакку улклул барачатшиву чIа тIий, хъудугьул савлугърая махъру лавхъуна Аздар СалихIовлул, Рапи Абакаровлул, Аьбдулхаликь Халикьовлул, Даниял Магьдиевлул ва чIявусса цайминналгу.
Гъумучиял колхозраву чIярусса шиннардий бивхьусса захIматрахлу барчаллагьран цаппарасса хъами-чиваркIуннан Юсуп МахIаммадовлул дуллуна цала чулухасса бахшишру.
ЯлунчIил хъарас щун Юсуп МахIаммадовлуща кьуру лавсуна райондалул ЦСОН-далул директор Шяпи Щурпаевлул.
