Укунмагу кьянатсса зунттал кIанттай кIинттул чIумал лапва ххи шай буруккинтту. Хаснува захIматсса бикIай щинал масъала, дяркъу шайхту, микIлачIлай тIий. ХьхьичIва зилурдай щин микIларчIсса чIумал неххардийн щинав занай бивкIхьурча хъами-душ­ру, хIакьину, ттизаманнул шар­тIирдайн вардиш хьуну, къатраву щин дакъахьурча цIуру-кIурулий бур.Бигьашиврийн ччя­ни вардиш шарухха. Ца авара бия Гъумукгу ЦIусса шинал дайдихьулий, шяраву щин дакъар, укунсса иш тачIав къабивкIссар, тIий.
Шяраваллаву муданма ца яла агьамсса ва захIматсса буруккин агьали щинал дузал баву бушиву кIулну, цува шяраваллил администрациялул бакIчинал къуллугърай ацIайхтува МахIаммад ХIусниев айивхьуна ми давурттаха зий. Ххюлусмату дурцу­сса щин кIинттул микIлачIлай, гъинттулгу, гъараллу гьарза хьурча, оьлухълай дикIайва. Администрациялул пишакартурал ва жагьилтурал кумаграцIух шяраваллил зуманицI водозабор дурну, кIиккун неххая дурцуну дур ца къяртта. ЩамарацIа марцI дурну дур щинал къуйрду. Пишакартуращал цувагу зий, занай, бакьин бувссар лахъан захIматсса кIанттурдайсса щинаххуллурду.
Гъилахъан кIайксса давур­тту дурну дунура, цукунни щин микIларчIсса? Тагьар ци дуссарив бавнунияр, ккав­ккун хъин­ссар тIий, МахIаммад ХIусниевлул нагу, райондалул больницалул давурттая интернетраву бусласисса Билалгу бувцунну Ххюлусмату щин дурцусса ратIув. Ххюлусмату жущал архIал ивзуна шяраваллил иширттаву чялишсса гьурттушинна дуллалисса, щин дакьин дуллалисса ппурттуву МахIаммадлунгу хъунмасса кумаг бувсса Жамбулат. РатI цурдагу дия шяраваллия архну. КIиккун кIилахъан баргъвагу къабияйссарив къакIулли, чачунгу микIиран даркьуну дия. Ччех бикIлай, багьлай, бизлай, бивру щинал турбарду бивхьусса кIанттайн. Вай турбарду цивппагу гъинттул бакьин був­ссар. РатIув щин чанну дур, думургу ялтту дагьну, щалла ратI микIиран даркьуну дур.
— Гьашину дяркъу ччянира хьунни. Марххаламур чан-кьансса бакъа къабунни, — бувчIин буллай ур МахIаммад ХIусниев. — Ва кIанттай щин дакьин дан жу тамансса давуртту дурссар. Аллагьнащал ва тIабиаьтращал ччалан къашайхха. Щинал гуж къалаллай, турбардавусса щин микIларчIун дур. Мунийн бувну турбардавух щин чанну дакъа най дакъар. Шикку щин салкьи дайсса кIану бан багьлай бур. Шичча нанисса щин дурцуну дур Ххюлусмав 32 къатлувун, ТIулизмав, ГьувкIрав, Гъумукгу чIявусса къатравун. МикIкъалачIуншиврул къатраву щин итадаркьунура дур. ХIакьину Гъумук буссар мяйва зилу: циняв зилурдаву щин дуссар, так Ххюлусмату дурцусса Къичил ккурчIавсса зилув личIаннин. Больницалий, детсадрай, школарттай, цаймигу агьамсса идарарттай щин ду­ссар. Гьухъаллал махIла ливчIун бур щин дакъа. Миккугу жу чаранну ляхълай буру агьали щинал дузал бан. МЧС-рал цIулещан дай машина тIайла буккай­ссар щинал бувцIуну. Хъунмасса барчаллагь цIу лещан дайсса идаралул каялувчи Мурад АьбдурахIимовлуйн ва тагьардануву жул чIарав ацIлацIисса.