ЦIуссалакрал райондалий мудангу хъуннасса къулагъас дувай район марцIну ядуваву мурадрайсса давурттах, чара бакъа гьар шинах, мюрщи-хъуни къакуну, циняв кьатIув бувккун, дувай субботникругу.
Вай гьантрайгу щалвагу Аьрасатнаву нанисса «Жулла неххардил ва бярдал марцIсса зумарду» тIисса экологиялул акциялуву гьуртту хьун, райондалий 200-нниха ливчусса инсантал бувккун бия Ярык-су, Ямансу, Аксайка неххардил зумарду ччюрклицIа марцI дуван. КатIригу ларххун, зий булувкьусса инсантурал ми неххардил зумардая дартIсса ччюрк, пух-пусур грузовикирттай ххилай, неххардил зумарду пар-партIи дурна. Акция баян бувссар июньдалул 1-нния июльданул 31-ннин. ТIабиаьтраха аякьалийсса акциялий чIявусса жагьилталгу гьуртту хьунни, жагьилсса никирангу асар хьувча жува яхъанахъисса кIанттурду марцIну, лазилавкьуну ччай бушивруцIун, му ххуллийсса давурттивгу дуллай бушиву.
