Август зурул 22-нний МахIачкъалалив, Сулайман Стальскийл цIанийсса бульварданий, хьунни Аьрасатнал ПаччахIлугърал Ттугълил КьинилуцIун дархIусса байран.
Ванил сиптачиталну бия «Единая Россия» партия ва мунил «Молодая Гвардиялул» региондалул отделение. Байрандалий шагьрулул агьулданийх ва хъамаллурайх бачIлай бия Аьрасатнал «триколорданул» лентарду, байрандалул тарихрая бусласисса буклетру, дия асфальтрай сурат дишаврил оьрчIансса конкурс ва личIи-личIисса суратирттал выставкартту.
Ва байрандалул мурадгу бур агьалинан Аьрасатнал Ттугълил тарих хъамакъабитаву.
ЯлунчIин Аьрасатнал Ттугълил юбилей дур. КIицI лавгсса партиялул «Жагьилтурал Гвардиялул» хъунама Сергей Никитиннул бувсунни му юбилейрайн лу итабакьин дакIний бушиву, му луттиравугу цачIун бувну бикIантIишиву Ттугълиясса асарду. Бувсунни, луттирал хъиндайдихьу дуван, шеърирду, суратру датIлай, зий байбивхьушиву.
Лажин хIадур дурссар
П. Рамазановал
