ХIамидлул арс Юсуп МахIаммадов увну ур 1958 шинал Вихьуллал шяраву. Буттал шяраву школагу къуртал бувну, дуклан увххун ур Дагъусттаннал шяраваллил хозяйствалул институтрал зоотехникалул факультетрайн. 

Му къуртал бувну махъ, аьралуннаву къуллугъгу бувну, 1985 шинал зий айивхьуну ур Лакрал райондалул бакIлахъия хIадур даврил инспекторну. Ца шинава ивтун ур му инспекциялул хъунама зоотехникну. 1990 шинал зун ивкIун ур Москавуллал «Москвич» заводрал Дагъусттаннайсса ттучандалул директорну. 1996 шинал ивтун ур «Агродаг» ФГУП-рал генералний директорну.
2007 шинал Юсуп увчIуссар Лакрал райондалул бакIчину. ХIакьинусса кьинигу, жард къаувкуну, зий ур му жаваблувшиву хъинну хъуннасса къуллугърай. Ва хъунаману зузиссаксса хIаллай райондалул чIалачIингу цин лархьхьуну хъин чулийннай диялну даххана хьунни. Ванал хIарачатрацIун ва бюхъулуцIун бавхIусса Лакку кIанттул мурадругу ялу-ялун ххишала хъанай бур.

---

Цукунсса хьуна оьрчIний вийнма яла гужсса асар биян бувсса зат, иш?
— Хъинну дакIний ливчI­ми­ннувасса цаннин ккалли бара Ккуллал райондалул лагрулийсса спартакиадалий жулла Вихьуллал команда ххув хьусса чIумалсса асар. Жу чIявуну ххувгу шайссияв.

Цими никирайн дияннинсса кIулли вин вила ппухълуннал нясав? Буси яла архманал цIа.

— КIулли мукьра никирайн дияннинсса: МахIаммад, ХIамид, Юсуп.

Инсаннал хасиятраву винна яла ккарккун къа­ччимур лишан?

-Щялмахъ. Хаин шаву.

Вила оьрмулуву яла арши бакъамур шин?

-Ттул оьрмулуву къархьуссар арши бакъасса царагу шин.

Яла ярши бумур шин?

— Аллагьнал ттунна итадаркьу­сса гьарцагу шин арши буссаннун ккалли дара.

ВичIара циксса арцу хьувкун, дигьаларгун дикIан­ссия вил дакI?

— Вайксса арцу ччивахха тIисса пикри ттул бакIравун тачIаввагу къабуххай. ДакIгу тIурча, дигьаларгун дикIанссар, ттула ичIувами, чIарахми цIуллуну, думур диял хъанай, жуйнува жува бакI буклай, хIалимну, хIалалну ялапар хъанай бухьурча.

Инсаннал тахсирдава­сса цумур тахсир хьун­ссия вища бигьану багъишла битан?

— ХатIалий хьумур.

Бувагу къабитан?

— Инсан аххаву.

Ссан диял къашай вил чIун?

— ЧIун мудангу чанну чIалан дикIай дуллалисса даврингу, ттула ичIаллингу.

Бартлавгун ччисса вила шанма мурад?

-Ттула наслу цала-цала къатрай цIуллуну, сагъну, талихI буну.
Вай жула Лакку кIанттул щархъурдай аргъ дизаву, учкъулартту оьрчIал буцIаву, шагьрурдай куннасса кIулшивуртту шяравугу ласун бюхъаву.
Шяраваллавусса ва шагьрурдайсса агьалинал багьу-бизу, оьрмулул шартIру цакуццуйсса даражалийн лахъаву.

Вила оьрмулуву хъинну ххирасса кIантту бувгьусса шама инсаннал цIа.

— Ппу, нину, кулпат.

Винма ххуй бизайсса хъамитайпалул сурат?

— На ттунма щарну бувцусса хъамитайпалул сурат.

Вина кьамулсса чув-адаминал сурат?

— Гъази-Гъумучиял аьрщарайн жува бувххун нанисса кIанттай гьайкал дацIан дурсса Хан-Муртазялил сурат.

Агарда бюхъай­сса бивкI­ссания, инава ци кIанттай, ци чIумал увну ва ци билаят­рай яхъанай ччива вин?

— КIа нава увсса, лявхъусса, хъуна хьусса Лакку билаятрай. Яхъанайгу ччива анжагъ жула Дагъусттаннай.

Ссаяту бикIай вил яла хъунмур пахру?

— Пахру буллансса кIанттайн ттигу ивну акъара, ттухьва цIуххирча. Ччива пахру буллансса давуртту ттигу бартдигьин. Масала, ттун ччива ттула арснайн «ва Юсуплул арсри» тIийнияр, ттуйнма ва «Залимханнул буттар» тIий машгьур хьун.

Яла къаххирамур дук­ра?

— Ттул дакъассар къаххирасса дукра. НенттабакI тIивтIуну ттулла хьхьичI дирхьусса, гьарцагу бусурманчунал бисмиллагь куну дукай­сса, дукра ишттахIрай дукара.

Яла ххирамур дукра?

— Лакку гьавккури.

Ссаятусса бикIай яла хъунмамур хIучI?

— Дуниял паракьат дакъа душивриясса.

Хьуссарив вил оьрмулуву винна инара ттинин багъишла ритан къахъана­хъисса къел?

— Къархьуссар.

Лавгсса заманардава­сса цIанихсса инсантурава­сса цуманащал хьунаакьин ччива вин?

— Ччива хьунаакьин МахIам­мад-Идавсищал (с. аь. в.). Му хьунаакьин кьисмат хьусса чIумул мутталийгу ччива Идавсийн лаизан, «вагьабистал» чавай, «тарикьатистал» чавай, «шиидтал» чавай, «суннитътал» чавай, цаннал ца пуч-палачат буллалисса вай вила уммат ца имандалийн ва ца ихIсандалийн буца тIисса миннатрай.

Цукунсса бур, вила пик­рилий, лакрал миллатрал яла хъунмур буруккин, цукунсса бур мунил ялун бучIантIимур?

— Халкьуннан зунсса кIанттурду зунттаву чансса бушиву, агьали шагьрурдайн бивзун лаглай бушиву, оьрчIру буллалаву чан хъана­хъаву. Аслийсса ниттил мазрай гъалгъа тIими, ккалаккими, чичлачими ялу-ялун чан хъанай бушиву.
Амма махъгу-хьхьичIгу инсантал зунттавунмай зана хьунтIиссар. Ялапаршиндаран яла ххуймургу, узданмургу кIану зунттавур бикIантIисса.

Ци дахчилай дур хIа­кьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?

— Алши бакъашиву Дагъусттанная цалсса яла лаглай дакъар. Хъунимину хъунмурчIин тIайла бацIлай бур дирирмур хъямала дуллалими. Дагъусттаннал ххаллилсса тарихраву ттулла цIагу ххуйсса ххуттай кьаританна, ва завод-фабрика банна, инсантуран зунсса кIанттурду дузал банна тIисса биялалул заллу ттинин бакIрайн агьлай акъар. Булувкьуну дахлай бия гьарзат. Совет заманнай бувсса школартту, детсадру, заводру, фабрикартту, районнал экономикалул ттарцIруну диркIсса колхозру, совхозру тили-хъили дурну гьан дурунни. КутIану учин, акъая бакI бюхттулсса каялучигу, мунацIунсса къуллугъчиталгу Дагъусттаннай дакI-лякьа цIий, му хьхьичIунмай хъит учин бансса чараннах луглагисса бажар-жижарданул заллухъру.

Ссапар Аьбдуллаев:
— ТIайланма учинна, Юсуп МахIаммадов Лакрал райондалул бакIчину увчIлачIисса чIумал, на кIанал чул бувгьуну акъассияв. Ва захIматсса райондалий цамур райондалиясса инсаннаща ци дан шайвав тIий щак-щуклий уссияв. Чул бувгьуну къаивкIхьурча, къаршинугу акъассияв. Амма ва бакIчину увчIиннинссагу, увчIуну махъссагу райондалул тагьар цачIу диширча, тапаватшиву хIисав къархьуну къаличIанссар.
Ттун ччай бакъар хьхьичIвами каялувчитурайн махъ тIун, амма иш мукун багьну бия, халкьуннал дянивсса ара ххуйсса дакъая. Политикалул тагьар ххуйсса дакъая. Ла­ккуйн ачинсса гъира къабикIайва. КIийвамигума шилунмай лихълай бия. ЦIанакул райондалул агьалинал дянив нахIу-хIалимшиву дур. Шиннардил лажиндарай Лаккуйн къалаглай бивкIсса халкь кIийнмай зана хъанай бур. КIий хъанахъисса иширттавух, мероприятиярттавух шагьрурдайсса лак хIала бухлай бур. На нава Юсуплул зана увунна ватандалийнай, цала тIайласса къуццу тIутIаврийну.

Зунттал райондалий ялапар хъанахъисса агьалинан яла аьркинмур ххуллурдур. Ххуллурду ба­къасса кIанттай оьрмулул тарг бакъассар. Ттун дакIний ба­къар Кьукнив, Аьхъардал чулийнмай, анжагъ гредер гьан дарча дакъа, цила багьайкун бакьин бувну. Биялну уттагу бувну, асфальт бутIлай байбивхьуну бур. Асфальт бувтIунни ШавкIрав бияннин. ШавкIрату Щаравсса ламул проект дурну дур. Ххюлуссуннал чулийнмайсса ххуллугу биялну утта бувну бур. КIа ххуллийхгу асфальт бакьлай байбишинссар чIал къавхьуну.
Хъунмасса буруккин бия зун­ттал кIанттай агьалинан ттукI биял хъанай бакъашиву. Лахъсса гужирал трансформатор бивхьуну, му буруккин буккан бунни.

Зунттал агьалинал маэшат лавай бансса ххуллуну Дагъусттан Республикалул ХIукуматрал ккав­ккун бия багъру бугьаву. Ххуйну зий бур райондалий му программалухагу, сайки мукьцIалла гектарданийн бивсса багъру бувгьуну бур.
Буруккин бия ттизаманнул тIа­лавшиннардацIун бавкьусса детсад райондалий бакъашиву. Му буру­ккингу яла лавгунни. Бувну къуртал бавай бур мукунма ттизаманнул шартIирдацIун бавкьусса школа.

Гьарца кIанттайва итталун ххяхлахисса буруккин бур ччюрк чун дичинссарив къакIулсса. Халкьуннан къачIалансса кIанугу личIи бувну, ччюрк ххилансса машина лавсунни. Гъумучиял паччахIххуллу, шагьрулий кунма, шюшлай бур, хьхьувайсса чаннал пперха тIий бур.
Жула Лаккуй ца яла аьнтIикIасса кIану бур Ханнал бяр. КIикку бигьалаган мухлукь халкьуннал бучIайсса бивкIун бур хьхьичIва. Ца-царай эмаратсса суратру дур тарихраву яхьуну. КунцIуллуйн кIура бавну бия. Утти бургияра ах­ттакьунмайгу, хьхьувайгу циксса инсантал букIлай бурив кIиккун бигьалаган.
Дагъусттаннал тарихраву хъинну агьамсса кIантту бувгьусса Сур­хай-Ханнал, Хан-Муртазааьлил цанналагу гьайкал дакъая уттинин Лаккуй. Халкьуннал каширдацIух ххаллилсса гьайкалгу дурну, Да­гъусттаннал Халкьуннал цашиврул байрандалул дайдихьу Гъумук дурунни, хъинну чIявусса бусрав­сса хъамалгу бувкIун, бюхттулсса даражалий. Юсуплул пикрирду ва ниятру ттигу чIярур. Жугу кIанал чIарав бацIантIиссару.

КIицI бан ччай ура ца цамургу агьамсса иш. ЛакрацIун жула ПаччахIлугърал ва ХIукуматрал вакилталгу Лакку билаятрайн лажинну кIура баен бувунни Юсуплул. Ттун дакIний бакъар хьхьичIва цаягу министр ягу вице-премьер Ла­ккуйн увкIсса чIун. Махъзуманив ми ччя-ччяни букIлакIи хьунни.
На дакIнийхтуну барча тIий ура Юсуплухь юбилей. ЧIа тIий ура ттигу Лакку билаятрал цIаний чIярусса шиннардий зунсса цIуллушиву ва тIайлабацIу.

Качар ХIусайнаева:
ЗахIматсса къуллугъ бухьун­ссар учара райондалул бакIчинал къуллугъ. Хаснува хIакьину. Хаснува халкьуннан хайрданунну зунна тIисса ниятрай увкIсса инсаннан. Юсуплул хIакъираву ттул цукунчIавсса ташвишшиву да­къар кьасттангу му муна му ниятрай увкIшиврий Лакрал райондалул бакIчишиврийн. Ттун къакIулли царагу лакрал агьамсса батIаву, Юсуп гьуртту акъасса. Лакрал миллатрал масъаларттаяр агьам­сса масъалартту цайми хьхьичIун багьайхьунссар.

Ттула ялун лухIи кьини дурксса гьантрай, аьзиз­сса арснал гьаттай буркIна бишин аьркин багьсса чIумал, на чару був­ссия КIунди-ЧIаратусса цIанихсса усттарначIа. Лакку чару ччай бия. ЧIарату чару шагьрулийн биян бан тIурча, бигьасса иш бакъая. Ламуснугу бунува, на Юсуплухь тавакъю бувссия, кумаг бакьай му хъунма­сса чару сагъ-саламатну Гьанжилийн биян бан куну: ЧIаратусса ххуллу паччахI ххуллийн букканнин захIматсса, дулантту чIярусса, бурхха. БучIан бувну къундалул бувцIусса хъус духхай машина, бивхьуну ганий шанна метIралияр лахъисса чаругу, кIай дуланттайх га машиналул хъирив цувагу машиналий увкIун ия Юсуп. Кьа­сса паччахI ххуллийн машина був­ккукун, ттучIангу оьвкунни. «Тти нигьачIин дакъассар, чару сагъну биянтIиссар», — увкуну. Чару лавсун увкIсса щупир цукунчIав арцу ласун ангу къавхьуна, ттунма багьайсса багьа ттун буллуссар, къурталссар тIий.

На Юсуплун мискьалданул­ссавагу кумаг бан каши дусса я къуллугъчи, я кашилул заллу къа­­бивкIра. Ттул биялалух мюхтажсса инсан кIагу акъая, я жул дянив гъан-маччашиврул, дус-къардашшиврул, бухху-буккаврил ара дакъая. Амма кIа ттул кьинилул чIарав уссу къаацIанну авцIуна. Мукуна авцIухьунссар, щак бакъа, цикссагу цаймигу инсантурал захIматссагу, ххариссагу кьинирдал чIарав.

Ялагу цамур чIумал, дукIу кказитрал юбилей дуллалийний, жува чантI учиннин, Юсуп сукку хьуну ия миллатрал кказитрал юбилейрал масъала лакраву махъ нанисса инсантуращал ххал бигьлай. Ванал сипталия байбивхьуну, бартгу диргьуссия «Илчи» кказитрал юбилей. Цала ца ихтилатраву Юсуплул куна укунгу: «Жува сивсуну щурун аьркинссару. Ва я вил кказит бакъар, я вил кьини дакъар. Ва миллатрал дагьанир. Миллатран лайкьсса даражалий тIайлагу дуккан аьркин­ссар», — куну.
Юсуп, на дакIнийхтуну чIа тIий бура вин вания тихуннайгу винмагу, лакрал вирдакIну хъанахъисса Гъази-Гъумучиянгу, райондалунгу, Дагъусттаннангу хайрданунну зунсса ттигу диялсса тавпикь!
Барча вил ирглийсса лахъазан!

Шалласу Шалласуев:
— Гьай-гьай, къабигьассар ацIния цара шинал лажиндарай гьарма рязи анну зун. Халкьуннан ччикунсса оьрму дузал бансса шартIру жучIара дакъар, мяъданну жучIава бакъар, хIачIайсса щиналгума кьянатшиву дур. Амма, лакрал агьали цайнна вихшала дирхьуну бушиву кIулну, Лакку билаятрал, миллатрал бучIантIимунил ялув дакI цIий зий ия Юсуп МахIаммадов щала чIумул мутталий.

На дакI дарцIуну учивияв, Юсуп МахIаммадов республикалул къуллугъчитурал дянив хъинну хIурмат-кьиматрай уссар куну. Уну тIий му хIакьинусса Дагъус­ттаннал районнал бакIчитураву ца яла жяматрацIун авкьусса, ссавур дусса каялувчи.
Мунал ххуйсса хасият дур дакI хъун дакъашиву, пахру-ххара ба­къашиву, агьалинащал маслихIат ккаккайсса ушиву, захIматрал кьад­ру кIулсса ушиву.

Мунал дурсса давурттая гъал­­­гъа тIурчарив, бусланмур чIя­вур. Миннува кIицI данна яла агьамми. ЦIахъардал Къуманива кIихунмайсса ххуллу бия, Муса Маннаров цалчин Лаккуйн нани­сса чIумалва бавкьуну бивкIсса асфальтгу тIавтIун, лап лащинсса тагьарданий. Утти гьарцаннан чIалай бухьунссар кIа ххуллул даража. Гьарца кIанттайсса цIуцIи кIану бур тIабиаьт ччюркливун дахьларгун душиву. Администрациялул зузалтращал цува зузи янналуву субботникирттайн уклай, агьали буттал улча ччюрклицIа марцI бавриха зузи бунни Юсуплул.

Ялагу жунма чIалай бия Ух­ссавнил Ккавкказнаву шагьрулун ккаллину бивкIсса Гъумучи цил бюхттулсса цIанин къалавхьхьуну лащинсса тагьарданий бивкIшиву. Утти, гьантта бувккуну, цила сипатрайн кIура баллан бивкIунни.
АкъавцIуну къахьунссар Хан-Муртазааьлил гьайкалданий. Ух­ссавнил Ккавкказнаву дакъассар хIакьинусса кьининийн кIа гьайкалданущал архIал дацIан дансса царагу гьайкал. Юсуплул сипталийну дурсса давур кIа.
Юсуп тачIав къауккайссар миллатрайн багьайсса цавагу иширал чIарах. Ва гьуртту акъа къашай­ссар лакрал аьлимтурал, чичултрал, шаэртурал, магьирлугърал иш­ккаккултрал юбилейрдал мажлисру. Юсуп МахIаммадов барча уллай, хIакьину на чIа тIий ура мунан яла бартлавгун ччимур хиял бартлагаву – Лакку билаятрайгу, лакрал миллатрайгу аргъ дизаву!

Бадрижат МахIаммад­хIажиева, Лакрал театрданул каялувчи:
— Юсуп ХIамидович Лакрал театрданул хьхьичIунсса ду­с-ихтиварди, чялишсса чIарахацIур. Мунал даингу хъинчулий ккаккай театрал магьирлугърал ишкка­ккултрал юбилейрал вечерду, жуява батIул хьусса артистурал аьпалул вечерду дансса сиптарду. Ми­ккунгу я цува учIайссар, ягу цала кумагчитал тIайла буккайссар. Юсуп МахIаммадовлул ка-кумаграйну ва гьурттушиндарайну Оьруснал театрданул хъунмур залдануву лайкьсса даражалий хьуссар Лакрал театрданул 80 шинал юбилейрал мажлис. Хъунмасса тIайлабацIулущал хьуссар мува мажлис Лакрал театр­данул цалчинсса шаттирду лавсъсса Гъумук.

Сайки цинявппагу премьерардайн учIайссар цала кулпатращал. Миллатрангу, щала республикалунгу хъуннасса агьамшиву ду­сса, Дагъусттаннал виричусса тарихрацIун дархIусса проектру чулийн дуркссар Лакрал райондалул администрациялул ва хасну Юсуп МахIаммадовлул гьур­ттушиндарайну. Мунал арцуйну­сса кабакьаврийну ккаккан був­ссар Гъумук «Хан-Муртазааьли», «ПартIу ПатIима», «АхIмад-хан Султан», «Оьтту ва макь», «Гъумучиял ПатIимат ва Бархъаллал Маллай».
Личность хIисаврай, Юсуп ур зунтталчунал яла язими хасиятру цаву дусса инсан. МуницIуна ва ур вичIи дишин кIулсса, инсаннал дакIниймур ласун бюхъайсса, инсаннал ва миллатрал буруккин­ттал чIарах къауккайсса чув.
Жу хъунмасса барчаллагьрай буссару Юсуп МахIаммадовлуйн, буттал кIанттул тарихрал ва магьирлугърал ирс ябан, райондалул агьали ттизаманнул пишакарсса творчествалухух гьан бан хъунна­сса къулагъас дуллай ушиврухлу.
Юбилей барча тIий, чIа тIий буру цIуллушиву! Чан къааннав ина лакрал миллатран!

Абакар Къюннуев:
— Юсуп МахIаммадов ттул яла хьхьичIунма дусри. Зувиллий шанна шинни жу кIулну. На райондалул комсомолданий зузисса чIумал му зий уссия шяраваллил хозяйствалул аралий. Яла на мунал идаралий хъунама бухгалтерну зий усси­яв. Ттун хъунмасса талихI хьу­ссар Юсуп кунасса инсан оьрмулуву ттуйна бакIрайн агьну.

Ва дахьа райондалул бакIчину зун увкIсса чIумал чIявуссаннал пик­ри бия, бюхъай уттигу мува пикрилийссагу бикIан, цала Ккуллал райондалийн къалавгун, шиккун циван увкIссар бакIчину тIисса.
Юсуплун цIа данну кIулну бия Гъумучиял ва щала лакрал тарих. Сурхай-Хан ва Хан-Муртазааьли мунал кумиртал бия. Му ттухь ччя-ччяни на яхIиравун утансса затру тIун икIайва: «КIа щала Ухссавнил Ккавкказнавух цIа ларгсса Гъумучи ци даражалийн багьссар? Дунияллийх цIа ларгсса лакрал тарих хъамабитан циван буллали­ссару зу?» – тIий.

ТIайламур бусан, цува къуллугърайн увчIуну кIира-шанна нюжмар гьаннина ва пашман хьуна, райондалийсса буруккинттал чIявушиврул. Ссая айишинссарив къакIулну ливчIун ия. Ми буруккинттал къурхъру ттирихIлай айивхьуна ххуллурдая ва щиная. Сайки цинявппагу администрациялул зузалт цайнма къаршину бивкIхьурчагу, ванал цуя-ца инсан даврия укьан къаувну, цалчин­сса батIаврий вихшалдарайсса ихтилат бувна, «ттулгу, зулгу мурад Лакку билаят цIу буккавур, мунил ялув жува архIал зун аьркин­ссару» куну. Юсуп буниялттунгу Лакку билаятрай дакI-лякьа цIий зун увкIсса инсан ушиву цанма бувчIукун, цинявппагу ванал лагма лавгуна. Юсуплул каялувшиндаралу дурсса давурттай къаацIанна, миннуя «Илчи» кказитрай чIявусса бувсъссар, бавссар. Жул даврил яла хъунмур тIайлабацIу чарий чару къаливчIсса шяраваллавун агьали зана хъанахъавур: НицIавкIуллал, ДучIиннал, Хъанардал, Сундараллал шяраваллаву шагьрурдайсса инсантал къатри дуллай бур, тиху-шихуннай дакъахлай, Лаккуйнмай бизан ччиминнахьхьун аьрщирду дуллан бивкIукун, Гъумучиял шяравалу мукьра километралул лахъи дурккун дур. Ва Юсуплул хIарачатрансса барачатри жула райондалийн кIура бавсса.

Шагьрулий маэшат бусса давугу, ххуйсса къатта-къушгу кьабивтун на шийнай къаучIантIиссияв, Юсуп акъа, цама инсаннащал. ХIакьину на ххарину ура Юсуп­лул чIарав ацIан бюхъаврия. Ттигу чIярусса давуртту дуссар жу архIал дуллансса, Аллагьнал кабакьирча!

ХIадур бувссар
Зулайхат Тахакьаевал