Дунияллул халкьуннал театрдал институтрал IХ-мур конгрессрай 1961 шинал цIакь дурну, муния мукьах гьарца шинал мартрал 27-нний кIицI лагайссар Дунияллул халкьуннал театрдал кьини. Лахъа-хъунну дувай му байран 12 паччахIлугърал театр бусса Дагъусттаннайгу.
Зулайхат Тахакьаева
Театрдал зузалт барча бан му кьини Къумукьнал театрданувун бувкIун бия ДР-лул культуралул министр Зарема Буттаева, цинявппагу театрдал каялувчитал, магьирлугърал ишккаккулт.
— Театр хъанахъиссар халкьуннал дянивсса дусшиву цIакь даврил ва куннан ку бувчIаврил ярагъну. ЧIяву миллатру бусса жула республикалул тамашачинан цала магьирлугъ ккаккан дуллай бур 12 пишакарсса ва 30 халкьуннал театр.
Цинявппагу театрдал коллективрду буссар Дагъусттаннал магьирлугърал халкьуннаву ватан ххирашиврул, дусшиврул ва мяърипатрал асарду тарбия баврил лавай бавцIуну. Республикалул театрдал бивтссар захIматсса ххуллу, муницIунма республикалул театрдал дуссар захIматран лархьхьусса даврил хьхьичIуннайшивурттугу, — увкунни культуралул министрнал.
КIицI лавгунни, Театрданул шинацIун бавхIуну, гьашину республикалул театрал оьрмулуву хьунтIий бушиву агьамсса ишру.
Муния махъ Зарема Буттаевал цаппара хьхьичIунсса актертуран ва театрданул зузалтран дуллуна министерствалул чулухасса наградартту.
«Дагъусттан Республикалул лайкь хьусса артистка» тIисса цIа дуллунни А. Къапиевлул цIанийсса Лакрал паччахIлугърал музыкалул ва драмалул театрданул жагьилсса актриса Зинаида Чавтараеван.