Сувра тIутIайх бичайссар июльдания сентябрьданийнин.
Суврарал чIапIай чIяруссар ментол ва ментон бусса эфирное масло. ЧIапIив батIайссар сура тIутIайх бичлачийни.

Суврарал инсаннал нерварду паракьат дайссар, къюву лагь дан кумаг байссар, аппетит гьаз бай­ссар, накI дагьан дайссар (кку­ккулий оьрчIру бусса хъаннин), ущу-щулгъи лихълахъи бай­ссар, ах-пув дуклаки дан кумаг байссар.

Хъин бувансса рецептру

Аритмия:
— Кьакьан бувну мюрш був­сса суврарал ца чяйлул къусул ялун ца стакан щаращисса щинал бувтIуну, кIучI дурну, 20 минутIрайсса дитайссар, диргьуну махъ хIачIайссар. Укунсса настой шинал лажиндарай гьарца кьини хIачIларча хъинссар.

Артрит:
— ТIутIайх бивчусса чIумал бавтIсса суврарал кацI кьакьан бувну, бадралувун бувтун, ялун щингу дуртIуну (1:3) лагрулий (ца бутIа суврарал 3 бутIа щинал) щаращи байссар 15 минутIрайсса. ДачIи ссятрайгу диртун ванналувусса кIирисса щинащал хIала дайссар.

Депрессия:
— Ца хъунна къуса кьавкьсса суврарал ялун ца стакан щаращисса щинал бувтIуну бишай­ссар цIарай 10 минутIрайсса. ХIачIлан аьркинссар бачIи-бачIи стакан кIюрххи-кьуннил.

Май щинал нанийни (насморк):
— Ца хъунна къуса суврарал ялун дутIайссар дачIи литIра щаращисса щинал, ца ссятрайсса кIучI дурну дитайссар, диргьуну махъ хIачIлан аьркинссар бачIи-бачIи стакан кIирисса настойрал, чансса ницIгу хIала дурну. Ва оьрчIангу хъинсса даруври. Хъуниминнан вайва настойрай майгу вилагларча хъинссар.

ХIал биллалинан (обморок):
— КIулшилийн увкIукун суврарал чяй хIачIларча хъинссар.

Лякьа хьюму ларсний.
— Ца хъунна къуса суврарал ялун ца стакан щаращисса щинал бутIайссар, 40 минутIрай диртун, дигьайссар. Мудан хIачIлан аьркинссар кIюрххил дачIра ххюттуйнгу, хьхьувай уттубишин хьхьичIгу. Ца-ца стакан гъили­сса суврарал щинал хIачIайссар хIаллих чан-чанну ххув тIий. Ва дарув мукунма бакьайссар ппав (отрыжка) тIутIинангу.

Косметикалул рецептру

КьацIлива кьанкь думиннан:
— Ца чяйлул къуса суврарал ялун ца стакан щаращисса щинал дуртIуну, кIучI дурну дитайссар 30 минутIрай. Вай настойрал ялун бутIайссар ца­ппара кIунтIру ссиркалул ягу лимондалул сокрал. Ккарччив марцI дурну махъ кьацI вилагайссар хIадур дурсса настойрай. Ва даруврал синттугу цIакь дайссар.

Яруннал лагмасса дурухлу (круги под глазами):
— Ккуччу бувну цIуну бавтIсса суврарал чIапIив ярунний бихьларча хъинссар.
— Ца-кIира хъунна къуса суврарал ялун 2 стакан кIирисса щинал бувтIуну цIарай дишайссар 5-10 минутIрайсса. ЦIарая дуркьун махъ чансса дякъингу диртун, диргьуну, паммалул тампонну итти бувну, ярунний бишайссар 1-2 минутIрайсса, ва процедура 3-4-ла тикрал дан аьркинссар.
ЦIуллуну битаннав.
Т.ХIажиева