Вай гьантрай Лакрал райондалийн увкIунни зунттал территориал округрай ДР-лул БакIчинал буржру биттур буллалисса Аьбдулмуслим Аьбдулмуслимов ва ванал кумагчитал Аздар СалихIов ва МахIаммад Мажидов.

Райондалул администрациялул актовый залдануву ванащалсса хьунабакьаврийн бавтIун бия шяраваллал администрациярттал бакIчитал, идарарттал хъуними.
Райондалул бакIчинал цалчинма хъиривчу Абакар Къюннуевлул бувсуна райондалий­сса социал-экономикалул тагьардания. Хаснува му авцIуна бувну къуртал къашавайсса больницалул ва школалул къатрай.
Гихунмай цалва ихтилатраву Аьбдулмуслим Аьбдулмуслимовлул барча бувна бавтIми Зунттал шин баян баврищал, зунттал районнал агьалинан му агьамсса иш бушиврий чIурчIав дуллай. «Республикалул зунттал районнах къулагъас дуллансса хъинсса дайдихьур ва», — увкунни полпреднал.
Хъирив Аьбдулмуслим Аьбдулмуслимовлул бавтIминнащал кIул унни райондалул цIусса куратор Аздар СалихIов.
ЧIявусса бия залдануву щя­бивкIминнал Республикалул БакIчинал вакилнахьхьун буллалисса суаллу. Ккурккуллал школалул директор Даниял Магьдиевлул тавакъю бувна архсса шяраваллал школарттах къула­гъас ххи дан, ми лакьин къабитан. Аьбдулмуслим Аьбдулмуслимовлул кIицI лавгуна школарттай дарцIуну душиву хIакьину шяраваллу, ми лакьирча, шяраваллугу духлаган тIий душиву. Чара бакъа баян банна увкунни му масъалалия Республикалул БакIчинан.
Райондалул детсадрал хъунмур Лиана Муртузалиевал тавакъюрайн бувну, делегациялул ххал дурна детсадрайсса шартIру. Лиана Муртузалиевал бусласимунийн бувну, детсадрай биялну бакъасса бур зузалтрансса кабинетру, оьрчIан дакъасса дур хIаятраву бялахълансса шартIру. Полпреднал райондалул каялувчитурайн тапшур бунни детсадрал бялахъайсса площадкалул масъала щаллу бан.
Аьбдулмуслим Аьбдулмуслимов делегациялущал лавгуна райондалул Аьрасатнал халкьуннал аслийсса культуралул центр ххал бан. Муния махъ лавгуна дурну къуртал давайсса детсадрал къатри ххал дан. Республикалул БакIчинал вакилнал цIа дуруна лавайсса даражалий дурсса давурттал.
Бивунни делегация Гъумучиял школалийнгу, ххал дурунни школалул шартIру. Ихтилат бувна учительтуращал ва дуклаки оьрчIащал.