[dropcap]Ч[/dropcap]Iявусса агьлугу бавтIун, лайкьсса даражалий хьунни ларгсса нюжмар кьини Лак­рал театрдануву Дагъусттаннал халкьуннал артист Аслан МахIаммадовлул оьрмулул юбилейран хас бувсса мажлис.

Зулайхат Тахакьаева
Мажлис бачин бувсса Марат Тимохиннул, юбиляр барчагу увну, юбилейрал мажлис тIивтIуна режиссер Аслан МахIаммадовлул ца яла хьхьичIунсса даврин ккаллисса, цувгу «Федерация» тIисса щалагу Аьрасатнал миллатирттал театрдал фестивальданий лавайсса кьиматран лайкь хьусса «Камаллул Башир» спектакльданувасса балайлийну.

ДР-лул Халкьуннал Мажлисрал хъунама Хизри Шихсаидовлул цIа чирчусса ссятгу юбилярнан пишкаш дурну, ванал хъиривчу Камил Давдиевлул увкуна:
— ХIакьину ттун дакIнийн багьлай бур, нава чIивиний, театр шяравун бувкIсса чIумал, Садикь гьуртту хъанай ушиву баярча, щяикIансса кIану бакъа, зал бувцIуну бикIайсса бивкIшиву. ХIакьинугу мукунмасса асар хIасул шай, Аслан спектакльданувух гьурттуну усса баяйхтугу.
Культуралул министрнал хъиривчу Мурад ХIажиевлул кIицI лавгунни республикалий Аслан МахIаммадовлул цIа бусравну душиву, так ца Лакрал театрданул тарихраву дакъассагу, Дагъусттаннал театрал магьирлугърал тарихравугу.

ДР-лул Жяматийсса Палаталул хъунаманал хъиривчу Ссапар Аьбдуллаевлул цала барчаллагьрал мукъуву увкуна:
— Садикь акъасса спектакль жун бизарну чIалан бикIайва. Му бюхттулсса ттугъ хIакьину лавсун най ур Аслан. Мисалдаран, Гогольлул «Ревизор» произведениялиясса спектакльданул премьералул кьини увкIуна Республикалул БакIчи Владимир Васильев. Ревизорнал, яни Аслан МахIаммадовлул, цала роль мукун усттарну дургьуна, Да­гъусттаннал БакIчи авцIуну хъат ришлай ия.

[dropcap]Ю[/dropcap]билярнал кьини хъун дуллалисса махъру лавхъуна ялагу Дагъусттаннал Театрал иш­ккаккултрал союзрал хъунама Айгум Айгумовлул, Лакрал Театрданул каялувчи Бадрижат МахIаммадхIажиевал, Оьрус­нал театрданул хъунама режи­ссер Скандарбек Тулпаровлул, Даргиял театрданул каялувчи Мусттапа Ибрагьимовлул, АьФ-лул культуралул лайкь хьусса зузала Качар ХIусайнаевал, Мариян Илиясовал цIанийсса «Дара­ччи» клубрал хъунмур Гульшан Хасаевал, Дагъусттаннал Композитортурал союзрал хъунама Рамазан Фаталиевлул, Да­гъусттаннал лайкь хьусса артист Владимир Мещериннул, Дагъус­ттаннал Чичултрал союзрал хъунама МахIаммад АхIмадовлул, республикалул культуралул зузалтрал профсоюзрал хъунмур Марзижат Буттаевал, педагог, шаэр Даниял Магьдиевлул, Дагъусттаннал халкьуннал шаэр Сибирбаг Кьасумовлул, Лакрал райондалул администрациялул бакIчинал хъиривчу Амсар Къажлаевлул, ЦIуссалакрал райондалул культуралул управлениялул каялувчи ХIабибат Буттаевал, Ккуллал райондалул культуралул управлениялул зузала ХIабибуллагь Кьурбановлул, Асланнущал Ттуплислив театрал институтраву дуклай бивкIминнал ва м.ц..
Яргсса программа хIадур дурну дия Асланнул даврил уртакьтурал.

[dropcap]Ю[/dropcap]билейрал мажлисрай кка­ккан бувна Аслан МахIамма­довлул бивхьусса спектакллавасса бутIри, артистурал увкуна балайрду. Лях-лях экрандалий ккаккан буллай бия Асланнул оьрмулувасса лахIзарду.
БайливтIуна мажлис Асланнул арснал арс Садикьлул цанна цIа дирзсса ттаттан хас дурсса назму дуккаврийну ва театрданул цинявппа артистурал Асланнухасса балай учаврийну.