Дагъусттаннал БакIчи Рамазан АьбдуллатIиповлул июньдалул 15-нний барча увкунни ДР-лул ПаччахIлугърал Советрал Бусравсса Председатель МахIаммадаьли МахIаммадовлухь ванал оьрмулул 85 шин шаву.

Региондалул Каялувчи ДР-лул Халкьуннал Мажлисрал Председатель Хизри Шихсяидовлущал, ДР-лул ХIукуматрал Председатель Аьбдуссамад ХIамидовлущал ва цайминнащал архIал лавгунни бусравсса юбилярначIан шаппай.
Тикку махъ лахълай, Рамазан АьбдуллатIиполул увкунни: «ХIакьину жун багьунни биттур дан уздансса даву – вихь барча учин оьрмулул 85 шин шаву! Мукун итххявхсса, цIадурксса инсантал Да­гъусттаннай ляхъайссар так-туксса, му Заннаяту ливксса зат бур.
Шиннардий салкьи бувсса, кьимат бищун къашайсса опыт ва лавайсса даражалул пишакаршиву му так вил потенциал бакъарча, му ди щалвагу Дагъусттаннал ва билаятрал потенциал. Ина хъунмасса захIмат бивхьунни миллатирттал дянив дусшиву цIакь давриву, региондалий щаллу дунни цалий бацIаву, Аьрасатнал Федерациялий республикалул цашиву ва щаллушиву дурурччуну. Махъ бакъа, ина хъанай ура хьхьичIунайсса Дагъусттаннал ва Аьрасатнал паччахIлугърал политикийсса ва жяматийсса ишккакку».
МахIаммадаьли МахIаммадов­лул дакIнийхтунусса барчаллагь увкунни, Дагъусттаннал БакIчинахь къулагъас даврихлу ва официалсса даражалий юбилейрал шадлугъру дан сипта даврихлу: «Цинияргу хьхьичI му ттул хIурмат бавур. Барчаллагь зуйн ттул даврин лавайсса кьимат бищаврихлу».
Ихтилатраву Рамазан Аьб­дулла­тIиповлул дакIнийн бувтунни, 1999 шинал августрал захIматсса гьантрай, бандитътурал кьюкьрал республика Аьрасатная батIул дан кьаст дурну, дагъусттанлувтуран архсса низам дишин ччан бивкIукун, МахIаммадаьли МахIаммадовичлул каялувшиврулу хъунмасса хIарачат бувну бивкIшиву террорчитуращалсса талатавриву.
ДакIнийн бутанну, хьхьичIмур кьини, Дагъусттаннал БакIчинал ХIукмулийн бувну, ПаччахIлугърал Советрал Бусравсса Председатель МахIаммадаьли МахIаммадовлун дуллуссар «За любовь к родной земле» тIисса хIурматрал лишан.
ХIадур бувссар
ХI. Аьдиловлул