Ноябрь зурул 19-нний Гумбет шяраваллил культуралул комплексрал залдануву хъуннасса шадлугъ хьунни: ЦIуссалакрал ва Гумбетуллал районну уссурвалсса районну шаврин хас дурсса. Му шадлугърай гьуртту хьунни республикалул жагьилтурал иширтталсса буллалисса министр Заур Кьурбанов, миллатрал политикалул министрнал хъиривчу Зикрулла Илиясов, ЦIуссалакрал райондалул бакIчи МахIаммад-ХIажи Айдиев ва Гумбетуллал райондалул бакIчи МахIаммадаьли МахIаммадаьлиев ва цаймигу бусравсса инсантал.

Му шадлугъ хьунни Миннацрал «Куначество» тIисса проектрал лагрулий. КIицI лаганну махъ шиннардий, ппухълуннал заманнай сийлий диркIсса, хъинсса аьдатру цIудуккан дувансса мурадрайсса тамансса давурттив дуллай бушиву, хъамал хIурматрай кьамул баву мудангу ппухълунначIа буржну чIалачIисса аьдат диркIшиву. Гумбетуллал райондалул хъуниминнал МахIачкъалалиясса ва ЦIуссалаккуясса делегация хьунабавкьуна Ахульго зунттучIа. Ми­кку буллалисса ЧIюй-къалалучIа, Аьлибаг Тахо-Годил цIанийсса Дагъусттаннал паччахIлугърал цачIун бувсса тарихрал ва архитектуралул музейрал Гумбетуллалмур филиалданул хъунама Ибрагьим Ибрагьимовлул бувсунни 1839 шиналсса къизгъинсса талатавурттая ва Ахульго буручлай бивкIсса вир­ттаврал гьунардая. Хъамал бивунни ЧиркатIиял шяравусса, ялув кIицI лавгсса, музейрал филиалданувунгу. Хъамал бивунни цаймигу кьимат­райсса кIанттурдайн.
Культуралул, тарихрал ва жагьилтурал форум тIитIлай, Гумбетуллал райондалул хъунама М. МахIаммадаьлиевлул бувсунни цува каялувшиву дуллалисса райондалул дусшиврийсса арарду душиву ЦIуссалакрал райондалущал, ЦIуссалаккуй Гумбетуллал агьлугу яхъанай бушиву, райондалул хъуниминнал миннах дагьайкунсса къулагъас душиву, мунал барча унни ЦIуссалакрал агьалинал цIунилгу хъунаману увчIусса МахIаммад-ХIажи Айдиев, бувсунни шамилчингу райондалул хъунаману увчIаву – му агьалинал вихшала душиву исват буллали­сса иш хъанахъишиву. Зикрулла Илиясовлул цалвамур ихтилатраву бувсунни ца райондалий личIи-личIисса миллатру яхъанахъаврил агьамшиврия. Заур Кьурбановлул ихтилат бия райондалул хъуниминнахь жагьилтуран проектру бакIуйн дуккан дуван кумаг бувара, миннал дуллалимуницIун кабакьияра тIисса. ХIажи Айдиевлул бувсуна цIуссалакрал агьалинал мина да­ххана дуллан багьсса захIматсса кьадардания, ци захIматшивуртту бакIрачIан дучIарчагу, агьали адаврай яхI буллай бушиврия. «Ва хIакьинусса хьунабакьаву тарихраву личIантIиссар. ХIакьину жува цIакьсса дусшиврул хъиндайдихьу дуллалиссару, дусшиврул ламурду лавхъссар, уттиния тинмайгу уссурвалшиврий къуццу тIунтIиссару. ЧIявусса миллатру бусса Дагъусттаннай хаснура дусшиву, нахIушиву, чIаххуврал хIурмат бушиву хьхьичIунну дикIангу аьркинссар», — увкунни ХIажи Айдиевлул.
Райондалул хъуниминнал цачIу дуллантIисса давурттив документирттайнугу цIакь дурна.