Ккуллал райондалул бакIчинал маслихIатчи ва пресс-секретарь Хизриев Шамхал Алхулавл арснан уттигъанну «Патриот России» тIисса медаль дуллунни. Шамхал Ккуллал райондалул бакIчинал пресс-секретарьну зун ивкIния махъ, ттулмур давугу хьхьичIуннай хьунни.
Райондалий хъанахъисса иширттая гьарта-гьарзану кказитрай буслан бювхъунни. Администрациялул ва «Илчи» кказитрал дянивсса дахIаву шаттирал хьхьичIуннай хьунни. На лайкьну дуллуссар тIиссара ттула даврил уртакьнан ва медаль. Ва дакъагу, Шамхаллун дуллунни Дагъусттаннал Ветерантурал советрал чулухасса грамота.
Шамхал Хизриев увссар 1956-ку шинал Ккуллал райондалийсса СумбатIуллал шяраву. ЧIяв къуртал бувну 10 класс, дуклан увххун ур Дагъусттаннал пединститутрал филологиялул факультетрайн. Му къуртал бувайхту цахъис хIаллай зий ивкIун ур Доргели шяраву цалла даврий. Хъирив армиялуву къуллугъ буван уцайхту, ва зий ивкIун ур хIаписарнал къуллугъирттай. Гьуртту хьуну ур 1999-ку шинал Дагъусттаннай хьусса аьрали иширттавух. Дуллуну дур ванан га чIумал «За отличие военной службы» II ва III степеньдалул медаллу. 2002-ку шинал майорнал чиндалуву аьраличунал касму кьадитайхту, зий ивкIун ур МахIачкъалалив личIи-личIисса давурттай. 2013-ку шинал ноябрьдания махъ зун ивкIун ур Ккуллал райондалул бакIчи Сулайманов Сяидлул маслихIатчину ва пресс-секретарьну. Шамхал ур, мукуна, Ккуллал райондалул госучреждениярттал зузалтрал Профсоюзрал комитетрал председательгу.
Шамхаллул райондалий хъинну ххуйсса давурттив дувай. Ва ур хъинну ххуйсса пропагандист, патриот, жагьилтурахь аькьлу-кIулши бусайсса, дакIнийхтуну Лакку билаят ххирасса зунтталчу.
Жувагу барча уванну жула даврил уртакь.
