ЦIуссалакрал райондалий оьрчIал байрандалулсса бан буржлувминнал къулагъас дунни байрандалул кьини майданнив буккан къавхьусса, мушакъатсса оьрчIахагу. Райцентрданул майданнивсса байран къуртал хьуну мукьах, балугъравун къабивсса оьрчIал иширтталсса буллалисса къуллугъ чIумуйну бартбигьлагьисса Кьурбанова Наида,
райондалул КIулшиву дулаврил управлениялул зузала Кьадиров Гьарун, Физкультуралул ва спортрал комитетрал председатель Абачараев Сулайман хIаласса делегация бивунни цIуллу-сагъшиврул тагьарданийн бувну школалийн занан къашайсса, шарда дарсру лахьлахьисса оьрчIачIан шаппа-шаппай.
Миннал ссайгъатру буллунни ЦIуссалакрал 1-мур школалий 4-мур классраву дуклакисса Эдильханов МухIаммадлун, ЦIуссамехельтIиял школалул дуклаки оьрчI Загьидов Шамиллун, Чараваллил школалул дуклаки душ Васирханова Сильвиян, Гьамиящиял 2-мур школалий дуклакисса ХIажиев ХIажиявн. ОьрчIру хъинну ххари хьунни хъамаллурал ссайгъатирттая. Нитти-буттахъулгу, оьрчIал ххаришиву чIалай, барчаллагьрай бия цалва оьрчIан ххарисса лахIзарду пишкаш бувминнайн. Укунмагу дунияллул чIярусса тирххандарая махIрум бувсса, тяхъасса оьрчIшивруя неъмат ласун къахъанахъисса оьрчIахсса къулагъас, гьай-гьай, асар хьунссар цинявннангу. Байран цинявппа оьрчIанссагу духьукун. Ялунгума байрандалул гьантрай бикIу, укунма бикIу бюхъайссаксса аякьа дуван багьаймири цIуллу-сагъшиврул нукьсаншиву думи оьрчIру. Мукунсса оьрчIру тарбия буллалисса нитти-буттахъахьхьун ссавур Аллагьнал дулуннав оьрчIру ччаннай бацIан буван, миннан цащава шайсса кумаг буван.
