1998-ку шинал, га чIумалсса Аьрасатнал Президент Борис Ельциннул хIукмулийн бувну, баян був­ссар ноябрь зурул махъра-махъсса алхIат кьини ниттил кьинину хъа­на­­хъишиву.
Гьай-гьай, шинал ла­хъишиврийсса кьинирдаву ца кьини ниттихъул дакIнийн бутлан багьлагьисса ХIукуматрал зумунусса ниттихъал кьинину ккаккан дурну духьурчагу, жунма, нитти­хъал арсурвавран, душваран, миннал чулинмайсса ургъил гьарца кьини бикIан багьлагьиссар. Гьарца ниттил къюкIлил лувату дурксса рухIирал шанна нину янилу дикIан багьлагьиссар: ца – цалламур нину, ца – хъунбава, гамур – ттатталбава.
ХIажимурад ХIусайнов
Ккуллал райондалий ниттил кьинилун хас дурсса тяхъашивуртту, хьунабакьавуртту, бахшишру дулаву, концертру най диркIунни нюжмардул лагрулий. Райондалул ва шяраваллал администрациярдал цачIуну, 10 оьрчI ччаннай бацIан бувсса 18 ниттин арцуйнусса бахшишру дуллунни.
КIицI дуванну вай ниттихъал цIарду: Аьбдуллаева Ссапижат, Гъазиева Саржанат (Хъусращи), Аьлиева ПатIимат, Аьлиханова Мисиду, Билалова ПатIимат, Рабаданова Мисиду, ХIажирамазанова Нурижат (Ккул), СалихIова Мисиду (СумбатIул), Кьурбанова Маржанат (1-мур ЦIувкIул), Илдарова Маржанат (Ваччи), Исяева ПатIимат, Сулайманова Жумяъ (ЧIяйми), Кьурбанова Маруся (Хъюйми), МахIаммадова Аьйша (ЦIуйши), МахIаммадова Ххадижа (Вихьул), Аьлиева АьтIикIат, АхIмадова Гьалли (Къян).
КIицI бувсса ниттихъан бахшишру дуллай, минначIан шаппайн занай бия Ккуллал райондалул Ветерантурал советрал председатель Загьидиев Аьбдул ва райондалул бакIчинал маслихIатчи Хизриев Шамххала. Бахшишру дуллалийни, культуралул зузалтрал вай ниттихъал ужагъирттай чIири-кьирисса концертругу ккаккан дурна. Цах уттинин укунсса ургъил къабувссар тIий, хъинну ххарину бия нину­хъру.
Хъинну ххуйну, бугьарами ва жагьилми ниттихъул цачIун бавтIун, шяраваллал бакIчитурал ва культуралул зузалтрал ххуй-ххуйсса тяхъашивуртту дунни шяраваллаву. Бусанна нава барану хьусса хьунабакьавурттая.

СумбатIлив
Ниттил кьинилун хас дурсса батIаву тIиртIуна Сумба­тIуллал шяраваллил бакIчи Оьма­ров Аьлиллул. Ихтилатру був­сса бугьарами ниттихъал бувсуна арамтуннаяр махъун къабагьшиву шяраваллил ниттихъул. Ужагърай гъилишиву ядаврицIун, оьрчIалсса, къатта-къушлилсса буллай, колхозрал давурттайн занай, хъу-лухччинулсса буллай бивкIссар ниттихъул куна. Дяъвилул шиннардий къанавртту дуккан шярава лавгсса 60 хъамитайпалува бувагу 6 зана хьуну бур. Ниттил кьинилущал СумбатIуллал хъами барча бувна Хизриев Шамххалал.
Шяраваллил Культуралул къатлул хъунмур Каптарова ПатIиматлул щаллу дурну дия хъинну ххуйсса тяхъашиву. Ванил чIарав бацIан бувкIун бия Ссухъиящиял культуралул къатлул директор Оьмариев ХIасайни ва Ваччиял культуралул къатлул худрук Суллуев Муслим. Махъатунин СумбатIуллал культуралул къатлува баллай бия балайрдал ва ххаришивурттал чIурду.

Вихьлив
Вихьуллал шяраву Ниттил кьи­нилун хас дурсса тяхъашивуртту дайдишиннин хьхьичI, 10 оьрчI ччаннай бацIан бувсса МахIаммадова Ххадижат барча бувна, арцуйнусса бахшишгу дуллуну.
Тяхъашиву дачин дурну бия Вихьуллал шяраваллил культуралул къатлул директор ХIасанхIусайнова Рукьижат. Махъ лавхъуна Вихьуллал шяраваллил уттигъанну цIуну увчIусса бакIчи Сулайманов СайкIул.
Ниттил кьини паччахIлугърал байранну та хьуссарив бувсуна Вихьуллал школалул учительницал Аьбдуллаева Сааьдатлул. Ванил мукунма цилва ихтилатраву кIицI бувна зунттаву яхъанахъисса нитти­хъан, тIабиаьтрал кьянкьашивурттайн данди бацIаву дакъагу, цила ниттил бурж багьайсса куццуй биттур буван хъуни-хъунисса захIматру бувшиву, буллалишиву. Ниттихъул барча буллай, ялагу махъру лавхъуна Загьидиев Аьбдуллул, Хизриев Шамххалал, Вихьуллал школалул учительтал ХIасанов МахIаммад-ТIагьирдул, МутIаллиев МутIаллил ва цайминнал. Байрандалийн бавтIми барча буллай, балайрду увкуна Камилова Маринал, Читаева ПатIиматлул, Бугъанова Заннишатлул, Мусаева РайхIанатлул, ХIасанхIусайнова Рукьижатлул, Хизриев Шамххалал, МахIатIуева Аминатлул. Бувна чIиви-кьивисса ссувхIатгу. Байрандалия циняв рязийну ливчIуна.
Ссухъияхь
На муданагу вихссара, ца инсаннан ччан бикIарча, чув ци даву дуллай ухьурчагу, ганаща жяматрал ишру дузал буван бюхъайшиврий. Лахъсса зунттаву, Щуну-Зунттул ухнилусса сунув дирхьусса Ссухъиящиял шяраваллил культуралул къатлул директорну Оьмариев ХIасайни итайхту, щурун диркIунни, шиккусса культуралул иширттацIун дархIусса давурттив дакъагу, жяматрал масъалартту ххал бигьлагьисса давурттивгу. Ххуйра-ххуйсса муххал магъи дирхьуну, Культуралул къатрал сий дучIан дунни. Вана уттигу, Ниттил кьинилун хас бувсса мажлис лахъсса даражалий бачин бувна Оьмариев ХIасайнил. Мажлисрайн бавтIун бия бугьарасса, жагьилсса ниттихъул, ялун кулпатрал хьунтIисса душру. Оьмариев ХIасайнил чIарав бацIан, ванал кьюкьа хъун дуван бувкIун бия ванащал культуралул давурттай зузисса СумбатIлия Каптарова ПатIимат, Ваччату Суллуев Муслим, ЦIуйшату АхIмадов АхIмад.
Мажлисрайн бавтIми барча буллай, балайрду увкуна Оьмариев ХIасайнил, Суллуев Муслимлул, Каптарова ПатIиматлул, АхIмадов АхIмадлул, Хизриев Шамххалал ва Ссухъиящиял душварал. Бувна чIивисса ссувхIатгу.
Шиккува гьаз бувна махъсса зурдардий жяматрал яла «цIуцIи кIануну» хьусса Ссухъиящиял шяравусса байбихьулул школа лакьаврийн бувну ялун бивсса буруккин. ДукIусса дуккаврил шинал Ссу­хъиящиял школалийн занай ивкIссар увагу 4 оьрчI. Миннахь дарс дихьлай уссия 4 учитель. Дагъусттаннал кIулшиву дулаврил министерствалул тIалавшинна дусса дур яла чанну, шяраву школа бикIаншиврул, 9 дуклаки оьрчI икIан багьлагьишиву. Ва иш хIисавравун лавсун, лавкьуну бусса бур Ссухъиящиял шяравусса школа. Мунил ялув бувсуна цалва пикри Сулайманов СайкIул: «Утти чанну бакъархха шагьрурдая шяраваллавун бизлазисса инсантал. Ссухъиящиял жяматрал пикри буван багьлай бур ва иширал ялув. Шяраву школа цIунил тIитIин хъанахъиссар, дуклансса тIалавшиндарайсса сияхIрайсса оьрчIру бухьурча», — куну.
Мажлис ялагу маркIачIаннин лахъи лавгуна.